DILI, 24 jullu 2019 (TATOLI) – Ministru Estadu Prezidénsia Konsellu Ministru no Ministru Petróliu no Rekursu Minerál en-ezersísiu, Hermenegildo Augusto Cabral Pereira hateten Ratifikasaun Tratadu Fronteira Marítima importante ba povu tanba garante fronteira permanente, ne’ebé hanesan lala’ok ida hatutan luta naruk ba ukun rasik-aan no soberania plena, nune’e mós bainhira tama iha vigór sei garante Timor-Leste nia dezenvolvimentu ekonómika.

“Hafoin independénsia polítika  ne’ebé alkansa ona tinan 2002, ida ne’e mós nu’udar hakat importante atu asegura independénsia no integridade territoriál, nune’e mós garante ita nia independénsia ekonómika”, intervensaun Ministru Agio iha enserramentu debate no aprovasaun pakote lejizlativa iha plenária Parlamentu Nasionál (PN), tersa ne’e.

Ministru Estadu Prezidénsia Konsellu Ministru, Hermenegildo Augusto Cabral Pereira. Imajen/doc.TATOLI

Governante ne’e realsa, bainhira define ona Timor-Leste nia baliza iha Tasi Timor, mak sei hetan los independénsia polítika no ekonómika, nune’e sei loke dalan ba dezenvolvimentu iha setór oin-oin, kria serbisu foun, dezenvolve infraestrutura no hasa’e investimentu no diversifika ekonomia.

Maski nune’e, nia admite importante liu mak permiti alkansa Timor-Leste nia soberania tomak ne’ebé ema hotu hein, hahú kedas iha deklarasaun independénsia, iha fulan maiu 2002.

“Ami agradese tebes ba Parlamentu ne’ebé aprova ona lei haat ne’ebé permiti tratadu ba fronteira marítima”, akresenta Agio.

Agio informa, konjuntu diploma legál hirak ne’e (lei no dekretu-lei sira) mosu tanba konsagra ona iha artigu 22 hosi tratadu kona-ba Tasi Timor, ne’ebé Timor-Leste negósia no asina tiha ona nu’udar nasaun joven independente.

“Sei vigora hela no estipula katak atividade hotu hosi kompañia petrolífera sira, ne’ebé servisu iha Tasi Timor tenke kontinua  maske tratadu kona-ba Tasi Timor sei la vigora, iha kondisaun hanesan ho kondisaun hirak ne’ebé estabelese ona tratadu nee”, nia katak.

Agio argumenta, razaun tenke halo ratifikasaun tanba Austrália konsistente nafatin nia pozisaun, katak aliña ho obrigasaun hirak ne’ebé estadu rua asume ona liuhosi tratadu no troka korrespondénsia.

Nia dehan tan, obrigasaun atu garante kondisaun ekivalente sira la’ós deit hosi kompromisu ne’ebé asume daudaun iha ámbitu tratadu ba fronteira marítima, maibé mós nu’udar obrigasaun istórika ida ne’ebé buras hela, hahú kedas Timor-Leste nia independénsia.

“Obrigasaun ita tenke asume iha altura frajilidade estadu nian, atu ita bele benefísia rekursu sira hosi área konjunta ba Dezenvolvimentu Petrolíferu no ida ne’ebé Timor-Leste tane-aas nafatin Estado de Bem“, nia akresenta.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here