Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 27 fevereiru 2020 (TATOLI) – Timor-Leste sai uma-na’in ba Fórum Rejionál Asosiasaun Nasaun Sudeste Aziátiku (ASEAN-sigla inglés) kona-ba Rezolusaun Disputa no Direitu ba Tasi, durante loron 27 to’o 28 fevereiru, ho partisipante hamutuk na’in-120 husi nasaun seluk.

Eventu ne’e organiza husi Ministériu Negósiu Estranjeiru no Kooperasaun (MNEK) hamutuk ho Gabinete Fronteira Marítima, Governu Austrália no Malázia, hodi enkoraja nasaun sira iha mundu bainhira atu rezolve disputa demarkasaun fronteira marítima, presiza tuir lei internasionál United Nations Convention for the Law of the Sea (UNCLOS).

Ministru Negósiu Estranjeiru no Kooperasaun, Dionísio da Costa Babo Soares, hateten Timor-Leste organiza fórum rejionál ne’e, atu hatudu oinsá rezolve disputa fronteira marítima ho baze ba konsiliasaun obrigatóriu ka tuir lei UNCLOS.

“Ita nia Maun Boot Xanana Gusmão sai oradór hodi fó vizaun Timor-Leste nian, tanba sá maka bele iha hanoin rezolve disputa fronteira marítima ho Austrália, deside adopta konsiliasaun obrigatóriu tuir lei internasionál UNCLOS,” tenik Ministru Deonísio iha Palásiu Governu, kinta ne’e.

Governante ne’e argumenta, perspetiva Timor-Leste no nasaun kiik sira atu rezolve disputa fronteira marítima entre nasaun mak tenki uza lei UNCLOS ne’ebé kria iha 1982.

Nia realsa, Timor-Leste rezolve ona disputa fronteira marítima ho Austrália ho baze fundamentu lei internasionál, maski iha nasaun balun lakohi uza lei ne’e hodi rezolve kestaun disputa.

Nia observa, daudaun ne’e akontese ba nasaun barak hanesan Filipina, Xina, Vietnam, Indonézia, inklui nasaun seluk, kona-ba disputa demarkasaun fronteira marítima.

“Ita organiza atu hatudu ba sira pelumenus fó prespetiva Timor-Leste nian ba mundu atu rezolve disputa demarkasaun fronteira marítima  uza konsiliasaun obrigatóriu iha lei UNCLOS. Timor-Leste mak nasaun úniku no dahuluk uza mekanizmu konsiliasaun obrigatóriu ida tuir lei internasionál”, nia akresenta.

Tanba ne’e, nia iha esperansa fórum ne’e bele hamosu referénsia barak.

“Ita espera iha fórum rejionál durante loron rua bele iha estudu kazu barak tanba ita kuandu ko’alia disputa fronteitra marítima, ita la’os ko’alia de’it demarksaun fronteira marítima maibé mós ko’alia kona-ba soberania no rikusoin tasi hanesan, ikan, mina no gás ne’ebé mundu ohin loron haree hanesan fonte ba moris nian,” nia hakotu.

Semináriu ne’e, fornese fórum espesífiku ida ba Estadu sira hodi diskute rezolusaun disputa liga ho direitu tasi nian iha rejiaun no sei foti ezemplu husi esperénsia rejionál sira, no mós husi péritu no akadémiku sira, hodi ezamina kazu anteriór sira, liuliu Timor-Leste no Austrália nia prosesu konsiliasaun bainhira estabelese fronteira marítima permanente liuhosi Komisaun Konsiliasaun UNCLOS.

Timor-Leste no Austrália mak hanesan nasaun dahuluk ne’ebé uza Komisaun Konsiliasaun hodi estabelese sira nia fronteira marítima.

Tratadu Fronteira Marítima ne’ebe asina ona iha 30 agostu 2018 mak hanesan pasu importante ba nasaun-rua nia relasaun bilaterál no direitu internasionál.

Fórum ne’e hanesan konsultativu rejionál ida, kompostu husi país partisipante hamutuk 27, ne’ebé mak buka atu fahe hanoin kona-ba asuntu seguransa iha rejiaun Ázia-Pasífiku.

Timor-Leste hetan konvite hodi hola parte iha Fórum ne’e hahú iha tinan-2005, no sai hanesan nasaun partisipante ne’ebé ativu no uma-na’in ba fórum antes ne’e iha 2011, 2017 no 2019.

Esperiénsia hirak ne’e haforsa Timor-Leste nia prosesu aplikasaun adezaun ba ASEAN, liu-hosi ninia kapasidade hodi partisipa no organiza eventu ASEAN.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here