Prezidente Repúblika,Francisco Guterres Lú Olo. Imajen Tatoli/António Gonçalves

DILI, 28 maiu 2020 (TATOLI)–Prezidente Repúblika (PR) Francisco Guterres “Lú Olo” deklara nu’udár Prezidente ba ema hotu, deside hodi halo renovasaun ba Estadu Emerjénsia tanba fó prioridade liu atu salva povu nia moris hosi surtu Coronavirus (COVID-19) ne’ebé oras ne’e invade mundu inklui Timor-Leste.

Notísia Relevante: Xefe Estadu Dekreta Ona Estensaun Estadu Emerjénsia Datoluk

“Salva povu nia vida mak ha’u-nia prioridade dahuluk nu’udár Prezidente hotu-hotu nian no ba ema hotu. Tanba ne’e mak ha’u renova dala tan Estadu Emerjénsia,” Deklarasaun ne’e,  PR Lú Olo fó sai liuhosi mensajen ba povu Timor-Leste kona-ba renovasaun Estadu Emerjénsia datoluk iha Palásiu Prezidensiál Bairru Pité, Dili, kinta ne’e.

Xefe estadu ne’e hateten, la’ós ho laran kmaan mak nia renova Estadu Emerjensia dala ida tan maibé presiza foti duni medida sira ne’e atu evita moras COVID-19 tama no maka’as liután iha Timor-Leste, to’ o pontu ida ne’ebé bele lakon kontrolu no lakon rikusoin boot liu mak ema.

“Salva povu nia vida mak ita hotu hakarak. Direitu ba vida tama mós iha lista direitu hosi ita-nia Konstituisaun. Enkuantu ita seidauk hatene oinsá  halakon Coronavírus foun ne’e iha mundu ka sientista sira seidauk deskobre vasina atu hasees umanidade hosi moras COVID-19, ita hotu sei hasoru risku  hetan moras ne’e no mate,” nia subliña.

Nune’e, nia dehan, deklarasaun renova Estadu Emerjénsia daruak nia objetivu boot liu mak  hasees risku hetan moras foun ne ‘e ka  hetan Coronavírus  ne’ebé identifika ona nu’udar kauza ba moras COVID-19.

“Nune’e, ha’u husu líder politiku sira, organizasaun ne’ebé de’it no sidadaun ida-idak atu kompreende tambasá Prezidente Repúblika foti desizaun ne’e atu bele simu ho laran ksolok no hakmatek,” nia dehan.

Ho renovasaun daruak ba Estadu Emerjénsia ne’e, Xefe estadu ne’e hateten direitu, liberdade no garantia balun tuir mai sei limita to’o 26 Juñu 2020 mak hanesan;

Kona-ba sirkulasaun internasional; Governu bele hatuur kontrolu sanitáriu iha portu, aeroportu no iha postu sira, iha ita-nia fronteira-rai. Bele la husik ema tama Timor-Leste ka husik ema tama maibé tenke tama uluk iha fatin-kuarentena no karik teste pozitivu, haketak sira iha fatin-izolamentu. Medida rua ne’e hanesan medida prevensaun atu la husik moras COVID-19 tama iha Timor-Leste no karik teste hatudu pozitivu, ita sei bele haketak sira atu evita moras ne’ e da’et ba komunidade. Governu sei hala’o nafatin medida sira atu asegura merkadoria sira tama  nafatin hosi rai-li’ur no servisu esensiál sira la’o nafatin;

Liberdade atu lao-ba-mai no atu hili hela-fatin; Tanba Estadu Emerjensia sei limita liberdade ida-ne’e. Autoridade públika kompetente  bele hatuur medida sira ne’ebé permite hamenus risku kontájiu hosi moras COVID-19. Medida sira ne’e inklui  obriga ema atu hela de’ it iha uma ka ba hela iha fatin-saúde nian ka iha fatin sei determina tuir mai. Medida espesiál ida tan mak serka sanitária. Katak, bainhira moras COVID-19 da’et ona iha nível komunidade, purezemplu, iha munisípiu ruma no susar ona atu kontrola, Governu bele determina serka sanitária ba munisípiu ida ne’e de’it. Tanba bandu ema labele sai hosi munisípiu ne’e, moras COVID-19, ne’ebé moris iha ema nia isin, sei la da’ et ba ema iha munisípiu sira seluk;

Direitu ba rezisténsia; Ho Estadu Emerjénsia,  direitu ida-ne’e sei limita tebes. Sidadaun sira tenki simu orden hatún hosi autoridade públika kompetente durante Estadu Emerjénsia. Biar la gosta sidadaun hotu-hotu tenke hatuir orden.

Hanesan mós períodu rua liubá,  Estadu Emerjénsia ba períodu ida ne’e labele afeta liberdade ba espresaun no informasaun, no labele mós afeta prinsípiu Estadu unitáriu ka kontinuidade territoriál Estadu nian.

Ba períodu Estadu Emerjénsia datoluk ne’e, tribunál sira sei hala’o nafatin sira-nia kompeténsia no funsaun maibé presiza mós kumpre norma konstitusionál no legál sira-ne’ebé mak regula Estadu Emerjénsia.

Durante Estadu Emerjénsia, sidadaun sira iha direitu nafatin atu hetan asesu la’ós de’it ba tribunál sira maibé mós ba Provedór Direitus Umanus no Justisa, tuir lei jerál kona-ba sira-nia direitu, liberdade no garantia. Sidadaun sira bele hato’o keixa bainhira sente afetadu hosi hahalok inkonstitusionál ka ilegál ruma.

Notísia Relevante: COVID-19, TL Tama Lista Númeru Mate Zero iha Sudeste Aziátiku

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here