Prezidente Repúblika,Francisco Guterres Lú Olo. Imajen Tatoli/António Gonçalves

DILI, 27 maiu 2020 (TATOLI)–Estadu Emerejénsia (EE) ba datoluk, ne’ebé Prezidente Repúblika (PR), Francisco Guterres Lu Olo  renova sei suspende direitu tolu mak hanesan Sirkulasaun internasionál, Liberdade sirkulasaun no hili hela-fatin iha territóriu nasionál inklui direitu ba rezisténsia.

Notísia Relevante: EE Faze Datoluk Foku De’it Ba Aspetu Tolu

Prezidente Repúblika Lú Olo temi suspensaun ba direitu tolu ne’e, liuhosi mensajen Prezidente Repúblika ba Parlamentu Nasionál kona-ba Renovasaun ba deklarasaun estadu emerjénsia ba territóriu nasionál tomak, tuir artigu 85 alínea g) hosi Konstituisaun Repúblika Demokrátika Timor-Leste, hahú hosi  28 -Maiu to’o 26 Juñu 2020.

Bazeia ba no ba efeitu sira husi artigu 85 alínea g) no artigu 25 Konstituisaun Repúblika nian, no haktuir artigu 9, 10, 11, 15 no 27 hosi Lei no. 3/2008, 22 Fevereiru, (Rejime Estadu Sítiu no Estado Emerjénsia nian) no hafoin haree katak iha duni situasaun kalamidade públika ida.

Prezidente Repúblika deklara atu hatutan Estadu Emerjénsia iha territóriu nasionál tomak durante loron 30 (tolunulu), hahú hosi loron 28 Maiu 2020 (loron-kinta) tuku 00.00 to’o loron 26 Juñu 2020 (loron-sesta) tuku 23.59, hodi suspende parsialmente direitu sira tuir mai ne’e.

Primeiru, Sirkulasaun internasionál: bele hala’o kontrolu sanitáriu iha portu, aeroportu no postu fronteira rai-maran sira, hodi la husik ema tama Timor-Leste. Obriga ema atu haktuir kondisaun lubuk ida ne’ebé nesesáriu hodi la husik moras COVID-19 da’et babeibeik ka evita hatodan rekursus ne’ebé mak aloka hodi kombate moras ne’e, inklui hatama ema iha kuarentena obrigatóriu; bele mós foti medida sira seluk ne’ebé nesesáriu hodi asegura sirkulasaun internasionál ba sasán no servisus bázikus.

Segundu, Liberdade sirkulasaun no hili hela-fatin iha territóriu nasionál: autoridade públika kompetente sira bele foti medida hodi hamenus risku kontájiu no hala’o medida prevensaun no kombate nian hasoru epidemia ne’e. Inklui halo izolamentu obrigatóriu iha uma ka iha estabelesimentu saúde nian ka iha fatin seluk ida ne’ebé determina no bele mós harii serka sanitária.

Terseiru, Direitu ba rezisténsia: Bandu hahalok ne’ebé hatudu rezisténsia, liuhosi forma ativa ka pasivu. Katak, la simu medida sira ne’ebe autoridade públika kompetente sira foti iha estadu emerjénsia.

Maibé, nia hatutan, renovasaun ba estadu emerjénsia ne’e labele afeta liberdade ba espresaun no informasaun no labele mós afeta prinsípiu Estadu unitáriu ka kontinuidade territoriál Estadu nian.

Nia mós hateten, Hanesan dekreta hosi Parlamentu Nasionál liuhosi Lei no. 1/2020 iha 27 Marsu no mós liuhosi Lei no. 3/2020 iha 27 Abril, ba períodu estadu emerjénsia datoluk ne’e, tribunál baibain sira sei hala’o nafatin sira-nia kompeténsias no funsaun maibé presiza mós kumpre norma konstitusionál no legál sira-ne’ebé mak regula estadu emerjénsia.

Durante estadu emerjénsia, sidadaun sira iha direitu nafatin atu hetan asesu la’ós de’it ba tribunál sira maibé mós ba Provedór Direitus Umanus no Justisa, tuir lei jerál kona-ba sira-nia direitu, liberdade no garantia. Sidadaun sira bele hato’o keixa bainhira sente afetadu hosi hahalok  inkonstitusionál ka ilegál ruma.

Konforme haktuir iha Lei no. 3/2008 hosi 22 Fevereiru no autoriza hosi Lei no. 1/2020 hosi 27 Marsu no mós Lei no. 3/2020 hosi 27 Abríl, durante períodu estadu emerjénsia datoluk ne’e, Konsellu Superiór Defeza no Seguransa sei hala’o ninia knaar nafatin.  Prokuradoria Jerál Repúblika no Provedoria Direitus Umanus mós  sei  funsiona permanente hodi bele hala’o sira-nia kompeténsia relasiona ho defeza ba legalidade demokrátika no direitu sidadaun sira-nian.

Renovasaun ba Estadu Emerjénsia sei la afeta aplikasaun ba regra konstitusionál sira relasiona ho órgaun soberania sira-nia kompeténsia no lala’ok, inklui direitus no imunidades titulár sira-nian.

Pedidu ne’ebé PR hato’o ba Parlamentu Nasionál buka asegura ba Governu meiu legál hirak ne’ebé nesesáriu hodi Governu bele hatán lalais no prevene surtu COVID-19 mosu tan iha Timor-Leste no  karik surtu ne’e akontese duni, Governu bele foti medida hirak ne’ebé presiza no adekuada hodi kombate virus ne’e atu labele da’et ba beibeik.

Notísia Relevante: PN Autoriza PR Lú Olo Dekreta Estensaun EE Datoluk

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here