Parlamentu Nasionál. Imajen Tatoli/Egas Cristovão

DILI, 27 maiu 2020 (TATOLI)—Parlamentu Nasionál (PN) aprova ona estensaun Estadu Emerjénsia (EE) datoluk hodi fó autorizasaun ba Prezidente Repúblika, Francisco Guterres ‘Lú Olo’ dekreta deklarasaun estadu emerjénsia ba fulan ida tán (loron-30).

Rezultadu votasaun ba estensaun Estadu Emerjénsia a-favór 40 kontra 1 no abstensaun 0. Deputadu António da Conçeicão hosi PD mak vota kontra. Iha estensaun EE ne’e Bankada CNRT, UDT/FM no PUDD auzénsia

“Ho nune’e estensaun Estadu Emerjénsia aprovadu. Parlamentu Nasionál hasai ona autorizasaun ba estesaun nune’e Prezidente Repúblika dekreta deklarasaun estadu emerjénsia. Ha’u-nia lia tatoli povu labele hamlaha,” PPN, Aniceto Guterres anunsia liuhosi plenária Parlamentu Nasionál, kuarta ne’e.

Tuir mensajen Prezidente Repúblika, Francisco Guterres ‘Lú Lo’ kona-ba estensaun Estadu Emerjénsia ne’e hosi hahú hosi oras 00.00 iha loron kinta-feira, 28 maiu 2020 no termina iha oras 23.59 iha loron sesta-feira, 26 juñu 2020 iha territóriu nasionál.

Iha implementasaun Estadu Emerjénsia datoluk ne’e, iha aspeitu tolu mak hanesan direitu sira sei suspensa, liberdade sirkulasaun no fixasaun rezidénsia iha territóriu nasionál no direitu rezisténsia kualkér atu ativa no pasiva.

Aspeitu tolu (3) ne’e direitu sira-ne’ebé sei suspensa mak hanesan, sirkulasaun internasionál, kontrola sanitaria bele hala’o iha portu, aeroportu no portu sira iha fronterira Terrestre, hodi kombate no impede moras ne’e atu labele tama mai territóriu Timor-Leste nian.

Nune’e mós liberdade sirkulasaun no fixasaun rezidénsia iha ne’ebé de’it iha territóriu nasionál: autoridade públika sira sei limita movimentasaun iha rai-laran hodi redús risku kontájiu no ezekuta medida prevensaun no kombate coronavirus (COVID-19), inklui konfinamentu kumpulsivu iha idak-idak nia uma.

Ikus liu mak direitu rezisténsia: kualkér atu (auto) rezisténsa ativa ka pasiva hasoru desizaun ne’ebé hasai hosi autoridade públika iha implementasaun Estadu Emerjénsia ne’e sei impede hosi autoridade públika.

Xefe Bankada Partidu Demokrátiku (PD), Deputadu António da Conçeicão husu hametin de’it vijilánsia iha área fronteira terrestre no la presiza estensaun EE datoluk.

“Ita la presiza halo Estadu Emerjénsia hodi hamate ekonomia rai laran tanba durante ne’e ekonomia rai-laran monu. Sé coronavirus ne’e ladauk sai ameasa boot iha ita-nia rain, dalan ne’ebé di’ak liu mak ita hola medida emerjénsia hodi nafatin halo vijilánsia no kontrolu atu trava propagasaun eh alastramentu moras ida-ne’e mai ita rain tanba moras ne importadu.

Maibé Deputadu PD ne’e husu hametin relasaun bilaterál ho Indonézia liuhosi dalan diplomasia atu proteje fronteira Timor-Leste ho Indonézia tuir Indonézia nia durasaun tempu.

Iha fatin hanesan Membru Bankada FRETILIN, Deputadu David Dias Ximenes, konsidera estesaun EE pertinente maibé atusaun governu nian hodi fahe subsídiu ba povu mós tenke emerjénsia.

“Atuasaun labele normál hela de’it, atuasaun tenke emerjénsia hotu. Ita limita ona populasaun buka rendimentu, ita tenke iha altertinativa nune’e povu labele hamhala, ne’ebé situasaun ne’e emerjénsia atuasaun mós tenke emerjénsia,” Deputadu FRETILIN ne’e afirma liuhosi plenária, Parlamentu Nasionál, kuarta ne’e.

 Xefe Bankada KHUNTO, Deputadu António Nobre Tilman, hateten Timor-Leste konsege elimina ona coronavirus maibé mantein medida prevensaun nune’e transmisaun labele tama mai.

“Ita seidauk manán hasoru pandemina COVID-19, ita só manán iha ita-nia responsabilidade no mantein ita-nia unidade. Ami-nia preokupasaun mak ne’e ita-nia ekipamentu, médiku sufisiente ona ka lae hodi enfrenta situasaun iha tempu oin mai,” hateten Deputadu António Nobre Tilman.

Vise-Xefe Bankada PLP, Deputadu Francisco de Vasconcelos, hateten implementasaun tarde tanba regra hosi fundu COVID-19 kesi governu.

“Ida-ne’e mak sai problema ba implementasaun Estadu Emerjénsia,” nia dehan.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here