Primeiru-Ministru, Taur Matan Ruak, hamutuk ho Membru Governu no ekipa CIGC diskute pedidu renovasaun deklarasaun EE husi Prezidente Repúblika, iha Sala Plenáriu PN, kuarta (27/05). Imajen Tatoli/Egas Cristovão

DILI 27 maiu 2020 (TATOLI) – Iha debate pedidu Prezidente Repúblika ba renovasaun deklarasaun Estadu Emerjénsia (EE), Primeiru-Ministru (PM), Taur Matan Ruak, relata EE iha faze datoluk ne’e, medida sira sei foku ba aspetu tolu.

Tuir Xefe Governu, medida ida duru ne’e sei konsentra iha aspeitu tolu, hanesan sirkulasaun internasionál ne’ebé liga ba fronteira sira, liberdade sirkulasaun sei limite tanba tenke fó kapasidade ba Governu atu kontrola karik iha nesesidade bele endurese ho medida restritiva no aspeto ikus liu mak direitu dezisténsia.

“Deputadu sira akompaña medida implementasaun Estadu Emerjénsia, iha faze dahuluk ami halo maka’as oituan, maibé iha fase daruak nian ami relaxa uza prinsípiu proporsionaidade no progresibidade relaxa, no ba faze datoluk ami hakarak relaxa liután. Ezemplu misa sira bele kontinua, eskola sira bele posibilidade maibé tuir regra sira ne’ebé iha, inklui atividade ekonómiku la’o filafali”, dehan PM Taur iha debate entre Governu no Deputadu sira iha Sala Plenáriu Parlamentu Nasionál (PN), kuarta ne’e.

Notísia Relevante: Xefe Governu Lamenta Auzénsia Deputadu Bankada CNRT iha Diskusaun Estensaun EE

Estensaun EE, Ministru Fidelis: Sei Iha Fleksibilidade Barak, Foku Taka Fronteira

Eis Prezidente Repúblika ne’e esplika, razaun atu halo estensaun EE tanba maski to’o oras ne’e seidauk eziste kazu ativu, maibé kazu konfirmadu COVID-19 iha Indonézia, liuliu Timór Osidentál aumenta ba bebeik.

“Hakarak atu hateten presiza halo estensaun tanba ita kuandu dekreta iha Estadu Emerjénsia dahuluk nian iha kazu ida de’it no to’o ikus kazu sira ne’e sa’e to’o 24. Finalmente neutraliza no agora laiha ona kazu ativu iha sentru izolamentu. Maibé hanesan Prezidente Repúblika hateten katak kombate ida-ne’e seidauk hotu, liuliu iha nasaun viziñu sira sei iha kazu no mundu tomak sei infrenta, tanba ne’e ita labele retira enkuantu perigu ida ne’e sei iha”, Xefe Governu subliña.

PM Taur nota, moras perigu ne’e mai inisialmente  importasaun husi Jakarta, Indonézia no agora iha probabilidade pelu kontráriu la’ós husi Jakarta maibé liuhosi fronteira terrestre iha Timor Osidentál.

“Husi fronteira ne’ebé besik loos, bainhira husi Jakarta ita toma medida atu lori sakrifísiu ba ita-nia sidadaun sira, maibé ida-ne’e tama tiha ita-nia odamatan maka ita relaxa fali, ha’u hanoin ne’e lójika atu sustenta ita-nia desizaun sira ladún koerente. Tanba ne’e, pedidu atu halo estensaun maibé mós iha mensajen husi Prezidente Repúblika nian katak ita konsentra liu ba iha aspetu tolu de’it. Signifika parte hotu ne’e ita relaxa”, nia salienta.

Daudaun ne’e, iha nasaun viziñu Timór Osidentál, Indonézia rejista ona kazu konfirmadu COVID-19 hamutuk ema na’in-79, na’in-neen rekuperadu no na’in-ida maka mate.

Hafoin Timor-Leste rejista kazu pozitivu COVID-19 dahuluk iha 21 marsu 2020, kazu ikus liu rejista iha 24 abríl ho totál konfirmadu na’in-24 no provável na’in-haat.

Enkuantu, iha loron 15 maiu, liuhosi Sala Situasaun, Sentru Integradu Jestaun Krize (CIGC, sigla portugés) deklara pasiente konfirmadu no provável rekuperadu hotu ona.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no Tama mai Timor-Leste liuhosi dalan fronteira terrestre no aeroportu.

Hahú loron 15 maiu, sistema alerta no resposta COVID-19 iha Timor-Leste  ne’ebé antes ne’e iha alerta 3 ‘Mitigasaun’, fila ba faze alerta 1 ‘Kontensaun’, nune’e komunidade sira bele kontinua halo prevensaun ba an rasik.

Coronavírus deteta ba dahuluk iha dezembru 2019 iha sidade xineza, Wuhan, no ema hamutuk millaun 5,4 ona maka infetadu moras ne’e iha mundu tomak no husi númeru ne’e ema na’in-300.000 maka lakon ona vida tanba vírus ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here