Prezidente Repúblika, Francisco Guterres Lú Olo. Imajen António Gonçalves

DILI, 26 maiu 2020 (TATOLI)–Prezidente Repúblika, Francisco Guterres “Lú Olo”, ohin, sei prezide reuniaun Konsellu Superior Defeza no Seguransa (KSDS) no Konsellu Estadu (KE) hodi rona  membru sira-nia hanoin kona-ba proposta Governu ba estensaun Estadu Emerjénsia (EE) ba fulan ida tan.

Notísia Relevante:  KM Solisita Tan Prezidente Repúblika Estende Estadu Emerjénsia ba Loron-30

Komunikadu ne’ebé fó sai hosi média Prezidénsia Repúblika hateten, Reuniaun Estraordináriu Konsellu Ministru, horisehik, foti desizaun ba estensaun estadu emerjénsia ne’ebé sei ramata iha 27 maiu 2020, ba fulan ida tan.

Governu nia pedidu ba estensaun estadu emerjénsia bazeia ba realidade kata, kazu pozitivu COVID-19 aumenta globalmente.

Tuir Organizasaun Mundiál Saúde kazu konfirmadu ho COVID-19 iha nivel mundiál hamutuk 5.240508. Surtu COVID-19 sei kontinua alastra hosi ema ba ema iha fatin ida ba fatin seluk. Organizasaun Saúde Mundiál fó-sai tiha ona katak seidauk hatene bainhira mak rohan hosi pandemia ne’e.

Maske Timor-Leste deklara ona laiha tan kazu konfirmadu, hafoin ema na’in-24 rekuperadu hotu ona  maibé ne’e la signifika Timor-Leste livre ona hosi COVID-19.

Haree ba númeru kazu konfirmadu iha Indonézia aumenta, partikularmente provinsia Nusa Tenggara Timur ne’ebé Timor-Leste fahe nia fronteira hamutuk, moras COVID-19 aumenta ba beibeik no tama ona iha transmisaun komunitária.

Prezidente Repúblika sei foti desizaun hafoin rona hanoin hosi Konsellu Superior Defeza no Seguransa no Konsellu Estadu.

Prezidente Repúblika sei dekreta Estadu Emerjénsia hafoin hetan autorizasaun hosi Parlamentu Nasionál.

Timor-Leste deklara kazu pozitivu ida ho COVID-19 iha loron 21 marsu 2020, ho Estadu nia naran, iha 27 marsu 2020 Prezidente Repúblika deklara Estadu Emerjénsia ba fulan ida. Prezidente Repúblika estende estadu emerjensia ba fulan ida tan, hosi 28 abril to’o 27 maiu 2020.

Estadu implementa Estadu Emerjénsia tanba atu hases sidadaun hotu-hotu iha Timor-Leste hosi kalamidade públika ne’ebé bele mosu hosi COVID-19.

Notísia Relevante:  Estensaun EE, Ministru Fidelis: Sei Iha Fleksibilidade Barak, Foku Taka Fronteira

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here