iklan

NASIONÁL, HEADLINE, POLÍTIKA

Estensaun EE, Ministru Fidelis: Sei Iha Fleksibilidade Barak, Foku Taka Fronteira

Estensaun EE, Ministru Fidelis: Sei Iha Fleksibilidade Barak, Foku Taka Fronteira

Primeiru-Ministru, Taur Matan Ruak prezide reuniaun Konsellu Ministru estraordinária iha Palásiu Governu, segunda (25/05). Imajen Tatoli/Egas Cristovão

DILI, 25 maiu 2020 (TATOLI) – Liuhosi reuniaun Konsellu Ministru (KM) estraordinária segunda ne’e, ezekutivu sira deside solisita tan Prezidente Repúblika (PR), Francisco Guterres ‘Lú Olo’, atu estende Estadu Emerjénsia (EE) faze datoluk ba loron-30 tan, ne’ebé sei ramata iha loron 27 maiu, oras 23:59.

Ba kestaun ne’e, Ministru Reforma Lejizlativa no Asuntu Parlamentár, Fidelis Manuel Leite Magalhães, klarifika EE faze datoluk ne’e, Governu sei fó fleksibilidade barak ba sidadaun sira atu halo movimentasaun maibé foku prinsipál maka taka fronteira terrestre.

Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen Tatoli/Egas Cristovão

“Atu klarifika katak Governu ninia hanoin kona-ba Estadu Emerjénsia ba datoluk ne’e sei relaxada liu katak sei iha fleksibilidade barak. Foku prinsipál mak atu kontinua taka fronteira hodi nune’e ema husi rai-li’ur labele tama mai ita-nia rai. La’ós de’it fronteira rai-maran, maibé lalehan no mós tasi”, dehan Ministru Fidelis hafoin reuniaun ezekutiva ramata iha Palásiu Governu, segunda ne’e.

Notísia Relevante: KM Solisita Tan Prezidente Repúblika Estende Estadu Emerjénsia ba Loron-30

Governante ne’e subliña, aviaun sei kontinua la tama, tanba aeroportu loke de’it ba aviaun espesífiku ne’ebé maka lori materiál nesesáriu sira.

“Hanesan mós tasi, atu nune’e bele fó biban movimentu ema-nia liuhosi tasi atu transporta ai-han”, nia akresenta.

Nia adianta, foku EE ba faze datoluk ne’e mós fasilita Governu, liuliu Ministériu Saúde atubele halo konfinamentu obrigatóriu ba sidadaun sira ne’ebé husi nasaun afetadu COVID-19.

“Ida-ne’e tanba faktu ida katak tuir Konstituisaun Repúblika Demokrátika Timor-Leste (RDTL) rasik katak Governu bele toma medida hirak-ne’e bainhira iha Estadu Emerjénsia. Kuandu uza lei babain de’it atu halo konfinamentu obrigóriu labele tanba ne’e halo impedimentu ba ema-nia direitu fundamentál sira, nune’e mós taka fronteira, bainhira uza lei babain de’it labele”, nia salienta.

Entretantu, tuir dadus provizóriu ne’ebé fó-sai husi Sala Situasaun, Sentru Integradu Jestaun Krize (CIGC, sigla portugés), to’o loron 23 maiu, ema na’in-2.279 maka pasa ona konfinamentu obrigatóriu loron 14, na’in-78 mak sei iha konfinamentu obrigatóriu no na’in-30 maka iha auto-kuarentena, enkuantu to’o oras ne’e kazu konfirmadu nafatin rejistadu 24 no seidauk iha kazu foun.

Daudaun ne’e, iha nasaun viziñu Timór Osidentál, Indonézia rejista ona kazu konfirmadu COVID-19 hamutuk ema na’in-79, na’in-neen rekuperadu no na’in-ida maka mate.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no tama mai Timor-Leste liuhosi dalan fronteira terrestre no aeroportu.

Jornalista: Antónia Gurmão

Editora: Julia Chatarina

iklan
iklan

Leave a Reply

iklan
error: Content is protected !!