Primeiru-Ministru, Taur Matan Ruak prezide reuniaun Konsellu Ministru estraordinária iha Palásiu Governu, segunda (25/05). Imajen Tatoli/Egas Cristovão

DILI, 25 maiu 2020 (TATOLI) – Liuhosi reuniaun Konsellu Ministru (KM), ezekutivu sira solisita tan Prezidente Repúblika (PR), Francisco Guterres ‘Lú Olo’ hodi estende Estadu Emerjénsia ne’ebé sei ramata iha loron 27 maiu, oras 23:59.

“Deside solisita Prezidente Repúblika ba estensaun Estadu Emerjénsia loron-30 tan”, refere nota imprensa ezekutivu ne’ebé Agência Tatoli asesu iha segunda ne’e, hafoin reuniaun KM.

Tuir Governu, nesesidade estensaun Estadu Emerjénsia tanba evolusaun no preokupasaun situasaun epidemiolojia no proliferasaun husi kazu rejistadu kontájiu COVID-19 iha país viziñu, Indonézia, liuliu iha Timór Osidentál.

“Tanba ne’e, eziji manutensaun aplikasaun medida estraordinária seluk, ne’ebé mitigadu, atu trava pandemia hodi evita transmisaun kazu infesaun foun COVID-19 iha territóriu nasionál”, subliña nota ezekutivu.

Governu konsidera durante implementasaun Estadu Emerjénsia, fó biban ba ezekutivu sira hodi implementa medida prevensaun no konsege hapara númeru konfirmadu.

Daudaun ne’e, iha nasaun viziñu Timór Osidentál, Indonézia rejista ona kazu konfirmadu COVID-19 hamutuk ema na’in-79, na’in-neen rekuperadu no na’in-ida maka mate.

Antes ne’e, Xefe Estadu dekreta Estadu Emerjénsia faze dahuluk, ne’ebé hahú entra ein vigór iha loron 28 marsu hahú oras 00:00  to’o 26 abríl 2020 oras 23:59, atu fó dalan ba Governu implementa médida espesífiku sira hodi prevene propagasaun COVID-19.

Haree ba nesesidade atu estende, Xefe Estadu promulga estensaun Estadu Emerjénsia períodu daruak ho durasaun loron-30 tuir pedidu Govenu.

Nune’e, iha loron 27 abríl, PR Lú Olo, liuhosi Dekretu Prezidensiál númeru 32/2020 promulga estensaun Estadu Emerjénsia (EE) períodu daruak ho durasaun loron-30, hahú husi oras 00.00 loron 28 abríl to’o oras 23:59 27 maiu 2020.

Entretantu, hafoin Timor-Leste rejista kazu pozitivu COVID-19 dahuluk iha 21 marsu 2020, kazu ikus liu rejista iha 24 abríl ho totál konfirmadu na’in-24 no provável na’in-haat.

Enkuantu, iha loron 15 maiu, liuhosi Sala Situasaun, CIGC deklara pasiente konfirmadu no provável rekuperadu hotu ona.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no Tama mai Timor-Leste liuhosi dalan fronteira terrestre no aeroportu.

Hahú loron 15 maiu, sistema alerta no resposta COVID-19 iha Timor-Leste  ne’ebé antes ne’e iha alerta 3 ‘Mitigasaun’, fila ba faze alerta 1 ‘Kontensaun’, nune’e komunidade sira bele kontinua halo prevensaun ba an rasik.

Coronavírus deteta ba dahuluk iha dezembru 2019 iha sidade xineza, Wuhan, no ema hamutuk millaun 5,4 ona maka infetadu moras ne’e iha mundu tomak no husi númeru ne’e ema na’in-300.000 maka lakon ona vida tanba vírus ne’e.

Jornalista: Antónia Gusmão

Editora: Julia Chatarina

2 KOMENTÁRIU

  1. Se EE ba datolu ne promulga ho razaun kazu covid-19 iha Indonesia (NTT), ulun bot sira Presija tetu didiak ba. Realidade hatudu momos situasaun EE ba daruak, povu trus, e imi garganta subsidi ba uma kain mos la realiza ate agora. Sa tan situasaun politika rai laran hanesan nb hamate ekonomika povu kiik, e kiak nian. Neluk nia velocidade mos valor liu fali situasaun ekonomika povu nian. Se hare ba razaun atu estende tan EE ba datolu ne, tuir hu nia hanoin dial liu lina fronteira terestre, tasi no Aeroporto taka total ba ema tama (nune moa Timor Oan). Hodi nune povu sira bele halo aktvdd ekonomika ho diak.

    Se lae, hnsan deit. Povu trus ba beik”, bot sira bokur b beibeik, tan salario fulan” tama hela.

  2. EE atu prolonga ba da 3 diak tamba bele to espasu ba ita nia ekipa husi COVID 19 bele halo serbisu ho diak liu tan. No fo tempo hodi bele hlo teste ba ita nia komunidade sira

HAKEREK NO HATÁN

Please enter your comment!
Please enter your name here