Ekipa Advogadu CNRT ne'ebé lidera husi Manuel Tilman hatama karta petisaun ba Tribunál Rekursu (TR), tersa (05/05/2020). Imajen/Egas Cristovão

DILI, 25 maiu 2020 (TATOLI) -Mezmu pedidu fiskalizasaun membru Bankada Parlamentár CNRT sira nian ba Tribunál Rekursu hetan “indefere” beibeik, maibé CNRT la lakon pasiénsia atu “buka justisa” ho “lia loos” ba desizaun no aktu Prezidente Repúblika nian ne’ebé CNRT konsidera dala balun kontra hela Konstituisaun RDTL.

Notísia Relevante : TR Indefere Pedidu Membru Bankada CNRT, Tilman : “Ha’u Sei Haree Loron-Ida Ka Rua Tan”

Membru Bankada Parlamentár CNRT na’in-18 liuhusi sira-nia advogadu Miguel Farria ho Manuel Tilman, iha tempu badak, sei halo rekursu ba Tribunál Supremu Justisa hodi konfirma desizaun Tribunál Rekursu nian ba “indefere” karta “petisaun” daruak nian ne’e justu ka la’e.

Iha sesta (22/05/20), TR liuhusi Juis koletivu kompostu husi Juiz Deolindo dos Santos, Juiza Maria Natércia Gusmão ho Juiza Jacinta Correia da Costa, “indefere” karta pedidu ba daruak husi membru Bankada CNRT sira-nian ne’e tanba tenke liu husi Parlamentu Nasionál hodi hetan apresiasaun husi membru PN ho baluk tolu rua (2/3).

Miguel Farria nu’udar Advogadu no reprezentante apoiu jurídiku no legal ba membru Bankada CNRT, segunda (25/05/2020), klarifika ba Ajénsia Tatoli  via telefone dehan, sira-nia parte simu desizaun TR nian, maibé preokupa ho desizaun ne’e tanba TR laiha justifikasaun no pronunsia buat ruma hodi kontinua “indefere”.

Notísia Relevante : Bankada CNRT Sei Hatama Keixa ba Tribunál Hasoru Bankada Tolu

Nia hatete, membru PN nain-18 ne’ebé halo “a baixu asinado” sira nia pedidu hanesan asaun sivíl tuir artigu 150 iha Konstituisaun RDTL, la’os atu akuza Prezidente Repúblika, maibé atu husu TR halo fiskalizasaun abstratu konstitusionalidade ba aktu desizaun Xefe Estadu nian liga situasaun impasse polítiku rai-laran.

“Sei iha dalan ba ami. Iha tempu badak sei halo rekursu ba Tribunál Supremu ne’ebé aas liu hotu, ho nia konteúdu rekursu hodi konfirma desizaun iha Tribunál Rekursu nian justu ka la’e,’’ afirma Miguel Farria.

Nia esklarese, rekursu ne’ebé hatama bazeia ba materiál faktu ho matéria jurídiku no tuir prosesu prazu ba rekursu atu hatama durante loron-15, exeptu la sura loron sábadu ho domingu (sura hosi loron despaxu notifikasaun TR nian).

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here