Karta desizaun Juiz koletiva Tribunál Rekursu nian hodi indefere ka la simu pedidu membru Bankada Parlamentár CNRT na'in-18 atu hus TR halo fiskalizasaun abstratu ba aktu no desizaun PR Francisco Guterres "Lú Olo" nian liga ho situasaun impase politika rai-laran. Dok. Ofisiál TR

DILI, 12 maiu 2020 (TATOLI) –Tribunál Rekursu (TR) indefere (la simu) karta pedidu husi membru Bankada Parlamentár CNRT na’in-18 nian ne’ebé husu ba Tribunál Rekursu atu halo fiskalizasaun abstrata ba aktu ho desizaun Konstitusionalidade Prezidente Repúblika (PR), Francisco Guterres “Lu Olo” nian liga ho situasaun impase polítika rai-laran.

Notísia Relevante : Membru PN Na’in-18 Husu Fiskalizasaun TR ba Aktu PR Lú Olo

TR nia karta resposta ka notifikasaun ba membru Bankada Parlamentár CNRT nian na’in-18. Dok. Ofisiál TR

Informasaun ne’ebé Ajénsia Tatoli sita husi karta resposta ofisiál husi Juiz koletiva Tribunál Rekursu nian, kompostu husi Juiz Deolindo dos Santos, atuál prezidente Tribunal Rekursu, Juiza Maria Natércia Gusmão ho Juiza Jacinta Correia da Costa, katak, TR  indefere karta pedidu husi membru  Bankada CNRT sira-nian ne’e tanba tenke liuhusi Parlamentu Nasionál hodi hetan apresiasaun husi membru PN  baluk rua (2/3).

Desizaun Juiz koletiva Tribunal Rekursu nian ne’e fó sai ona iha loron 11 maiu 2020. Entretantu, husi parte membru Bankada Parlamentár CNRT nian foti kestaun ne’e hodi halo karta pedidu ba TR tanba sira haree no konsidera katak durante ne’e PR Francisco Guterres “Lú Olo” foti desizaun liga ba situasaun polítika iha rai-laran hamosu violasaun hasoru Lei Inan ka Konstituisaun Repúblika Democratica de Timor-Leste (KRDTL) artigu 72.

Relasiona ho desizaun TR  nian hodi indefere  pedidu membru bankada Parlamentár CNRT nian ne’e, Ajénsia Tatoli halo konfirmasaun direita ho Advogadu Manuel Tilman, liuhusi kontaktu telefónika, maibé Manuel Tilman rejeita atu ko’alia barak iha tempu agora. Ho nune’e, nia husu atu fó tempu ba nia halo deklarasaun ofisial iha loron ida ka rua mai tan (aban ka bainrua).

“Agora ha’u la responde buat-ida.  Aban ka bainrua, imi bele halo konfirmasaun, mas agora ha’u okupadu hela,” hateten Manuel Tilman iha komunikasaun telefónika ne’e.

Jornalista  : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here