Membru Bankada CNRT, Adérito Hugo da Costa. Imajen Tatoli/Egas Cristóvão

DILI, 19 maiu 2020 (TATOLI) – Bankada Parlamentár Congresso Nacional da Reconstrução de Timor  (CNRT), sei hato’o keixa hasoru Bankada Parlamentár tolu hanesan Frente Revolusionária Timor-Leste Independente (FRETILIN), Partidu Libertasaun Populár (PLP) no K’manek Haburas Unidade Nasionál Timor-oan (KHUNTO) ba Tribunál Rekursu.

Deputadu Bankada CNRT, Adérito Hugo da Costa, hateten Bankada CNRT sei aprezenta keixa hodi haree legalidade rejimentál no konstutusionál ba votasaun distituisaun atuál Prezidente Parlamentu Nasionál (PPN), Arão Noé de Jesus da Costa Amaral.

“Ohin, ita akompaña laiha regra administrativu no tékniku sira atu sura votu ne’e. Ho baze Rejimentu Parlamentu Nasionál no halo plenária la prenxe rekezitu rejimentál no konstutusionál, tanba ne’e ninia prosesu finál sei iha Tribunál Rekursu”, tenik Deputadu Adérito Hugo iha resintu Parlamentu Nasionál (PN), tersa ne’e.

Notísia Relevante: Arão Noé Sei Hato’o Rekursu Ba Tribunál Rekursu

Bankada Parlamentár tolu deside halo votasaun liuhosi votu sekretu iha plenáriu ho rezultadu votu maioria a-favór 40, laiha abstesaun no kontra, hodi hili atuál Xefe Bankada FRETILIN, Aniceto Guterres ba PPN foun, enkuantu vise na’in-rua mantein, Primeira Vise-Prezidente, Agelina Sarmento husi Bankada PLP no Segundu Vise-Prezidente, Luís Roberto husi Bankada KHUNTO.

Tuir Adérito Hugo, razaun Bankada CNRT hato’o keixa ba Tribunál tanba atuál PPN Arão Noé ne’ebé eleitu nu’udar PPN iha tinan-2018 sei hala’o funsaun ho normál, tanba ne’e nia parte konsidera aktu deputadu sira husi bankada tolu iha plenáriu la tuir dalan loloos.

“Posizaun Bankada CNRT nian katak votasaun distituisaun ne’e tuir dalan ilegál, maibé nia rezultadu ikus Tribunál mak deside. Ami-nia planu ohin kedan hatama prosesu ne’e ba Tribunál atu prosesa tuir lei tanba laiha ajenda plenáriu horisehik no ohin maibé ohin hanesan inisiativa husi deputadu bankada tolu sira”, nia argumenta.

Eis PPN ne’e adianta, Arão Noé rasik sei defende ninia-an hodi hatama keixa ba Tribunál.

“Dalan di’ak liu maka ba Tribunál, ne’ebé kuandu prosesu sei la’o iha Tribunál laiha dalan ida atu Prezidente Parlamentu Nasionál ne’ebé ohin hili husi bankada tolu ne’e atu lidera meza”, nia akresenta.

Iha biban ida ne’e, Deputadu ne’e husu ba populasaun sira atu tuur hakmatek hodi akompaña aktu ne’ebé Bankada CNRT halo tanba hakarak defende desizaun polítika sira tuir dalan legál ka konstitusionál.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here