Airnorth atera iha Aeroportu Internasionál Prezidente Nicolau Lobato, sesta (03/04). Imajen Tatoli/António Gonçalves

DILI, 22 maiu 2020 (TATOLI) – Iha loron 07 abríl Governu Timor-Leste no Airnorth selebra kontratu ligasaun aéreu atu garante konektividade iha situasaun emerjénsia nia laran no sei halo operasaun semana ida dala-tolu.

Kustu operasaun bá-mai dala ida husi Darwin-Dili hamutuk $15.000 no kustu ida ne’e tuir Governu kiik liu kompara ho kompetitór seluk ne’ebé antes ne’e konkorre konkursu públiku.

Ba kestaun ne’e, liuhosi pájina ofisiál Governu klarifika, durante operasaun bainhira Airnorth hetan rendimentu husi tula sasán merkadoria ka privadu inklui pasajeiru, maka ninia reseita sei oferese ba Governu Timor-Leste.

Atu informa tan katak kualkér reseita ne’ebé kompañia aérea hetan liuhusi operasaun sira ne’e to’o valór totál ne’ebé selu tuir akordu servisu aéreu ne’ebé asina ona hodi hola kadeira pasajeiru sira ka hodi transporta merkadoria sira, Airnorth maka sei selu ba Governu Timor-Leste hodi nune’e bele hamenus ona kustu totál operasaun nian”, refere nota husi Governu ne’ebe Agência Tatoli asesu, sesta ne’e.

Notísia Relevante: Governu Halo Akordu ho Airnorth Tanba Fornese Valór Kiik Liu Kompara ho Aviaun Seluk

Airnorth Lansa Voo Dahuluk Tula Ai-Moruk no Ekipamentu Médiku ba COVID-19

Governu liuhosi Autoridade Aviasaun Sivíl Timor-Leste (AACTL, sigla portugés) iha loron 4 abríl deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19.

Maski nune’e, haree ba nesesidade iha situasaun emerjénsia nia laran, Governu Timor-Leste liuhosi Ministériu Transporte no Komunikasaun (MTK) deside selebra akordu ho Airnorth, ne’ebé sei permite operasaun aéreu sira entre Dili no Darwin atu tula ekipamentu médiku relasiona ho COVID-19

Akordu hirak ne’e mosu, hanesan resposta ba restrisaun viajen nian ho eskala boot ne’ebé Governu estabelese ona hodi hapara propagasaun COVID-19, inklui evita atu Timor-Leste labele sai izoladu, sein iha konetividade globál ne’ebé mak esensiál ba movimentu merkadoria, fornesimentu médiku sira ka ba transporte pasajeiru sira iha situasaun emerjénsia nian.

Nune’e, iha loron 10 abríl,  Airnorth lansa voo dahuluk tula ai-moruk no ekipamentu médiku nesesáriu hodi kombate COVID-19.

Aleinde ne’e, Airnorth durante ne’e tula amostra laboratóriu, ne’ebé tenke ba konfirma iha Darwin no ekipamentu médikuseluk maihusi Darwin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here