Aviaun Airnorth tula ai-moruk no ekipamentu ne'ebé nesesáriu hodi prevene no kombate COVID-19. Imajen Tatoli/Florêncio Miranda Ximenes

DILI, 10 abríl 2020 (TATOLI) – Hafoin Governu Timor-Leste selebra akordu ho kompañia aéreu, Airnorth, aviaun australianu ne’e lansa voo dahuluk tula ai-moruk no ekipamentu médiku nesesáriu hodi kombate COVID-19.

Tuir akordu ne’ebé estabelese ona iha loron tersa (07/04), ligasaun aéreu ne’e atu garante konektividade iha situasaun emerjénsia nia laran no sei halo operasaun semana ida dala-tolu.

Ho nune’e, Airnorth ho tipu Embraer E170 to’o iha Aeroportu Internasionál Prezidente Nicolau Lobato, Comoro, iha sesta (10/04), iha oras 14:35.

“Aviaun ida ne’e ho Embraer E170 husi Airnorth, aviaun sei semo ba mai semana ida dala-tolu entre Dili no Darwin, hodi garante kontinuasaun konetividade aérea nian ho forma ida hodi tula ai-moruk no ekipamentu ne’ebé nesesáriu hodi prevene no kombate COVID-19 no mós formesimentu ba sasán esensiál sira no merkadória fundamentál sira ba vida populasaun nian no ba empréza nasionál sira”, refere nota imprensa ne’ebé Agência Tatoli asesu, sesta ne’e.

Akordu hirak ne’e mosu, hanesan resposta ba restrisaun viajen nian ho eskala boot ne’ebé Governu estabelese ona hodi hapara propagasaun COVID-19, no evita atu Timor-Leste labele sai izoladu, sein iha konetividade globál ne’ebé mak esensiál ba movimentu merkadoria, fornesimentu médiku sira ka ba transporte pasajeiru sira iha situasaun emerjénsia nian.

Ministru Estadu Prezidénsia Konsellu Ministru, Hermenegildo Augusto Cabral Pereira, konfirma katak Governu Timor-Leste foti medida konkreta sira hodi proteje povo timor-oan no garante seguransa ba nasaun.

“Laiha buat ida mak importante liu fali saúde no ita-nia povu nia seguransa”, dehan Ministru Hermenegildo.

Ministru Transporte no Komunikasaun, José Agostinho da Silva, subliña katak Governu iha responsabilidade garante nesesidade ba ninia povu sira.

“Ita-nia Governu iha responsabilidade atu mantein rota tránzitu aéreu nian ida hodi garante katak ita bele kontinua lori materiál atu ajuda hasoru dezafíu sira ne’ebé maihusi COVID-19”, nia realsa.

Governu liuhosi Autoridade Aviasaun Sivíl Timor-Leste (AACTL, sigla portugés) iha loron 4 abríl deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19.

Maski nune’e, haree ba nesesidade iha situasaun emerjénsia nia laran, Governu Timor- Leste liuhosi Ministériu Transporte Komunikasaun (MTK) deside selebra akordu ho Airnorth, ne’ebé sei permite operasaun aéreu sira entre Dili no Darwin atu tula ekipamentu médiku relasiona ho COVID-19.

Haree ba suspensaun provizóriu ne’e, iha semana ikus, operadór aéreu sira ne’ebé durante ne’e halo operasaun iha Timor-Leste, inklui Airnorth fó sai ona sesasaun servisu durante Estadu Emerjénsia.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here