Sidadaun Estadu Unidu Amérika na’in-14, iha domingu (12/04), desloka ba sira nia rain ho Airnorth tanba surtu COVID-19. Imajen Tatoli/António Gonçalves

DILI, 17 abríl 2020 (TATOLI) – Ministru Reforma Lejizlativa no Asuntu Parlamentár, Fidelis Manuel Leite Magalhães, informa razaun Governu halo akordu ho Airnorth hodi transporta ekipamentu médiku no halo operasaun iha situasaun emerjénsia, tanba kompañia aéreu australianu ne’e oferese valór kiik liu kompara ho aviaun seluk.

“Montante $15.000 ne’ebé ita selu ba Airnorth, hodi voo bá-mai Darwin-Dili ne’e montante ki’ik liu kompara ho presu ne’ebé kompetitór hotu fó. Di’ak liu no baratu liu mak Airnorth, baratu tanba kompetitór sira seluk husu valór boot liu ka tiga kali lipat liu fali Airnorth”, dehan Ministru Fidelis iha edifísiu Ministériu Finansa, Aitarak-Laran, sesta ne’e.

Notísia Relevante: Governu Halo Charter ba AirNorth Voo Ba-Mai Dala-Ida ho Kustu $15.000

Tuir governante ne’e, Airnorth hakarak fó valór menus husi kompetitór seluk tanba konsidera Timor-Leste hanesan parseiru.

“Airnorth nia argumentu katak ne’e importante hodi asegura tanba Timór hanesan nia parseiru, ne’ebé iha situasaun difísil hanesan ne’e nia labele soe hela Timór”, nia haktuir.

Fidelis hatutan: “Iha kontratu dehan Governu selu $15.000 ne’e, maibé bainhira tula kargu ruma karik osan sira husi kargu ne’e filafali mai Timor-Leste. Ezemplu iha $15.000 hodi halo pagamentu aviaun bá-mai, maibé bainhira iha loron ida ne’e nia tula kargu ho montante $3.000, maka iha fulan ikus ita halo konta husi $15.000 ne’e ita só selu maka $12.000 de’it”.

Nune’e mós, Timor-Leste presiza asegura amostra sira ne’ebé dehan iha sintoma COVID-19, tenke ba konfirma iha Darwin no ekipamentu sira mai husi Darwin, tenke tuir dalan tama mai.

“Durante kompetisaun iha empreza haat, tanba sá mak tenke aviaun husi Austrália? tanba fonte medikamentu sira barak liu sei mai husi Austrália, aleinde ne’e instituisaun ida ne’ebé fó apoiu maka’as liu ba ita iha teste amostra COVID-19 ne’e maka iha Northern Territory ne’e. Tanba ne’e maka hakarak ka lakohi ita tenke asegura ligasaun ho Darwin”, nia subliña.

Ministru Koordenadór Asuntu Ekonómiku interinu ne’e esplika, razaun semana ida Airnorth bá-mai Darwin-Dili dala-tolu tanba iha situasaun ida agora iha nesesidade.

“Tanba iha nesesidade duni no aviaun labele semo dala-ida de’it, la’ós hanesan mikrolete ida katak ami presiza tenke mai depois para ne’e labele, maibé sira tenke asegura katak semana nia laran tenke priense duni ho retornu ne’ebé sira hetan. Bainhira tun liu nia labele sustenta nia operasaun mai Timór, maski ita mak kontrata maibé ita la’ós na’in ba aviaun”, Ministru adianta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here