Prezidente Parlamentu Nasionál Sesante, Arão Noe de Jesus da Costa Amaral. Imajen /Egas Cristóvão

DILI, 21 maiu 2020 (TATOLI)—Prezidente Parlamentu Nasionál sesante, Arão Noé de Jesus da Costa Amaral, muda ona ba bankada Congresso Nacional da Reconstrução de Timor (CNRT) no Prezidente Parlamentu Nasionál foun, Aniceto Guterres, hahú normaliza funsionamentu parlamentu nian.

Notísia Relevante: Aniceto Guterres Eleitu Ba PPN, PD Apoia ho Votu 4

Prezidente PN Sesante, Arão Noé, kontinua la simu ho rezultadu votasaun iha tersa-feira tanba ne’e sei halo rekursu ba Tribunál Rekursu tuir regra legál ne’ebé iha.

“Agora ha’u mai ona iha bankada. Agora ita hein tribunál nia desizaun kona-ba prosesu sira-ne’e hotu. Ha’u lamentavel uitoan tanba eleisaun hanesan ne’e tanba ketua kelas eskola nian mós sei formal maibé eleisaun ba Prezidente Parlamentu hanesan loos merkadu. Maibé, ita submete ba desizaun no ita hein órgaun seluk nia kompeténsia,” Arão Noé informa ba jornalista sira, iha resintu bankada CNRT, iha PN, kinta ne’e.

Maibé, nia dehan, nia sei hala’o nafatin nia knaar no mai iha Parlamentu Nasionál  hanesan titular nafatin hodi hala’o servisu hanesan baibain.

“Ha’u-nia kna’ar hanesan deputadu titulár nafatin hodi mai servisu hanesan baibain, prezidente parlamentu ne’e kestaun seluk. Ita husik órgaun seluk hala’o nia kna’ar, desizaun saida de’it mak sai mai ita hotu-hotu submete, ida-ne’e mak estadu direitu,” nia dehan.

Tuir nia, estadu direitu demokrátiku ema hotu kumpre prosedimentu legál ne’ebé iha.

Entretantu, Prezidente Parlamentu Nasionál foun, Aniceto Guterres, sai hosi bankada FRETILIN hasoru uluk Vise-Prezidente Parlamentu Nasionál, Deputada Maria Angelina Sarmento Lopes no Segundu Vise-Prezidente Parlamentu Nasionál, Deputadu Luis Roberto hodi ko’alia kona-ba normalizasaun funsionamentu parlamentu nian.

“Ohin, ha’u atu hahú hodi normaliza funsionamentu parlamentu nian tanba parlamentu ita labele husik paradu hanesan ne’e. Agora buat hotu liu ona. Prezidente iha dever tomak haree funsionamentu parlamentu nian. Ohin mós ami atu halo konferénsia líder bankada. Antes ba konferénsia, ha’u tenke hasoru uluk vise-prezidente na’in-rua,”  Aniceto Guterres, informa ba jornalista sira, iha Parlamentu Nasionál, kinta ne’e.

Tuir Agência TATOLI nia observasaun, iha resintu Parlamentu Nasionál, funsionáriu sira muda ona dokumentu sira Arão Noé nian ba nia rezidénsia no eskoltu sira balun muda ona hodi fó eskolta ba Prezidente Parlamentu Nasionál foun, Deputadu Aniceto Guterres.

Entretantu, situasaun polítiku iha Parlamentu Nasionál normaliza ona tanba deputadu sira hala’o sira-nia kana’ar iha bankada ida-idak nian.

Iha Parlamentu Nasionál, funsionáriu sira mós hahú prepara ona kondisaun balun iha sala konferénsia molok Prezidente Parlamentu Nasionál, Aniceto Guterres, lidera reuniaun líder bankada sira hodi fixa ajenda balun ba plenária ba loron tuir-mai.

Prezidente Parlamentu Nasionál foun, Aniceto Guterres, hahú normaliza funsionamentu parlamentu nian tanba rezultadu eleisaun ba Prezidente Parlamentu Nasionál ne’ebé hala’o iha tersa (19 maiu 2020) ne’e, públika ona iha Jornal da República,  Publicação Oficial da República Democrática de Timor-Leste, ho data publikasaun tersa (19 maiu 2020).

Notísia Relevante: Arão Noé Sei Hato’o Rekursu Ba Tribunál Rekursu

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here