Prezidente Parlamentu Nasionál, Aniceto Longuinhos Guterres Lopez.

DILI, 19 maiu 2020 (TATOLI)—Bankada parlamentár kompostu hosi Frente Revolusionária Timor-Leste Independente (FRETILIN), Partidu Libertasaun Populár (PLP), Kmanek Haburas Unidade Nasionál Timor Oan (KHUNTO) no Partidu Demokratiku (PD) hili ona Aniceto Guterres troka Prezidente Parlamentu Nasionál, Arão Noé de Jesus da Costa Amaral.

“Ha’u konvida Prezidente Parlamentu Nasionál eleitu mai iha meza,” Vise-Prezidente Parlamentu Nasionál, Deputada Maria Angelina Sarmento Lopez, informa iha Parlamentu Nasionál, tersa ne’e.

Rezultadu Votasaun, FRETILIN 23, KHUNTO 5, PLP 8 no aumenta tán votu haat  (4) hosi Partidu Demokrátiku.

“Rezultadu votasaun a-favór 40 tanba ne’e pedidu destitui Arão Noé de Jesus da Costa Amaral aprovadu no Deputadu Aniceto Guterres sai prezidente Parlamentu Nasional”, anunsia Deputada PLP, Regina Freitas, ne’ebé sura votu iha votasaun ne’e.

Ho nune’e, kompozisaun meza iha Parlamentu Nasionál kompostu hosi Prezidente Parlamentu Nasionál Aniceto Guterres, Primeiru no Segundu Vise-Parlamentu Nasionál nafatin manetin ho Deputada PLP, Maria Angelina Sarmento, Deputadu KHUNTO, Luis Roberto.

Entretantu, deputadu sira bankada CNRT kontinua hakilar no rona Deputada Virgínia Ana Belo nia lian hakilar “Votasaun ne’e ilegál no la tuir lei”.

Antes ne’e, Xefe Bankada CNRT, Duarte Nunes dehan, Xefe Bankada CNRT ne’e argumenta, artigo 16 (Eleisaun ba kargu PN) alínea 1 deskrevre kandidatura ba kargu Prezidente Parlamentu Nasionál tenke subskreve hosi deputadu na’in-10 mínimu to’o na’in-20 másimu, no sei entrega ba Prezidente ein-ezersísiu 24 oras molok atu hala’o atu-eleitorál.

Alínea 2 hosi artigu ne’e Eleisaun ba Prezidente sei hala’o tuir eskrutíniu sekretu iha sesaun plenária no alínea 3 subliña kandidatu ne’ebé hetan maioria absoluta hosi votu Deputadu eleitu sira-nian mak sai Prezidente. Alínea 4 hatutan karik la iha kandidatu ida-ne’ebé eleitu, sei halo kedas eleisaun foun iha reuniaun plenária ne’e duni.

Nune’e mós artigu 19 kona-ba Eleisaun ba Vise-Prezidente, Sekretáriu no Vise-Sekretáriu sira ne’ebé fundamenta hahú hosi alínea 1 to’o 6.

“Se ita tuir regra konstitusionál sira-ne’e buat la’o di’ak, laiha ema-ida mak impede. Ita halo hotu eleisaun iha loron ne’ebe ke sira eleitu. Sira hamriik iha oin, ita hotu ba kaer liman, buat hotu la’o di’ak. Tanba saida mak tenke atu hadau de’it ne’e. Se nafatin VIII Governu labele tanba VIII Governu labele eziste ona tanba CNRT sai ona,” nia fundamenta.

Nia haktuir, antes ne’e CNRT fó apoia maibé sai ona, agora hela de’it deputadu na’in-13 (Bankada PLP iha kadeira 8 no KHUNTO iha kadeira 5), ida FRETILIN apoiu ne’e seidauk formál.

Xefe Bankada CNRT ne’e konsidera vise-prezidente parlamentu nasionál prezide meza hanesan polítika obriga-aan tanba rejimentu no lei la permite.

Notísia Relevante: Deputadu Na’in-36 Aprova Ona Pedidu Destituisaun

Jornalista : Evaristo Soares Martins

Editór     : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here