Prezidente Parlamentu Nasionál, Arão Noé. Imajen António Goncalves

DILI, 19 maiu 2020 (TATOLI)—Prezidente Parlamentu Nasionál atuál, Arão Noé de Jesus da Costa Amaral, laiha koñesimentu ba rezultadu votasaun ohin nian no sei hato’o rekursu ba Tribunál Rekursu hodi husu lia-loos.

“Ha’u laiha koñesimentu ba eleisaun meza parlamentu ninian tanba laiha ajenda no aprovadu hosi líder bankada sira para hodi halo plenária ba loron ohin. To’o rezultadu voatasaun sai, kandidatu mós laiha, kontajen votu mós la ho prezensa tékniku sira hosi parlamentu. Ha’u sei hato’o rekursu ba Tribunál Rekursu,” dehan Arão Noé de Jesus da Costa Amaral ba jornalista sira, iha Parlamentu Nasionál, tersa ne’e.

Prezidente Parlamentu Nasionál ne’e hatutan, ajenda ohin ne’e vise-prezidente na’in-rua mak tau iha meza.

Nia haktuir, dezde lejizlatura dahuluk to’o agora eleisaun ba prezidente no meza parlamentu Nasionál ne’e sempre nakloke no hotu-hotu partisipa, ema hotu-hotu rona hafoin anunsia rezultadu votasaun.

“Eleisaun ida ohin ita bele dehan sein ema ida hatene. La hatene akta iha ne’ebé. Ninia rezultadu entrega iha sé. Kontajen ba tau iha ne’ebé. Tuir rejimentu votasaun ne’e laiha lejitimidade kona-ba prosesu eleisaun,” nia hateten.

Arão Noé rekoñese deputadu maioria mak halo eleisaun maibé prosesu eleisaun tenke tuir prosedimentu legál ne’ebé iha tanba prosesu legál mak determina maioria ka minoria.

“Kona-ba prezidente parlamentu rua ne’e ha’u lahatene maibé ha’u sei buka rekorre ba Tribunál Rekursu hodi buka lia-loos. Se prosesu ne’e legál no loos ha’u sei kumpre. Ha’u sei hala’o ha’u-nia knaar tanba seidauk ofisisializa hodi hein desizaun tribunál nian. Orsida ha’u buka meiu enkamiña kedas ba tribunal,” nia dehan.

Prezidente PN ne’e lakohi promete tempu kona-ba prazu atu hatama ba Tribunál Rekursu ne’e maibé hatama rekursu ba tribunál hodi defende lia-loos.

“La’ós defende ha’u-nia aan, tanba sasán ne’ebé ema fó loron ruma ema sei hasai. Ha’u laiha problema. Importante mak prosesu sira la’o tuir prosedimentu legál no rejimentál,” Prezidente Parlamentu Nasionál (PPN) ne’e hateten.

Notísia Relevante: Aniceto Guterres Eleitu Ba PPN, PD Apoia ho Votu 4

Jornalista : Evaristo Soares Martins  

Editór        : Cancio Ximenes

HAKEREK NO HATÁN

Please enter your comment!
Please enter your name here