Situasaun iha sala plenáriu bainhira Aniceto Guterres (klaran Faru coklat) eleitu sai PPN foun, tersa (19/05). Imajen Tatoli/António Gonçalves

DILI, 19 maiu 2020 (TATOLI) – Deputadu Bankada Frente Revolusionária Timor-Leste Independente (FRETILIN), Aniceto Guterres, ne’ebé eleitu sai Prezidente Parlamentu Nasionál (PPN), hateten bainhira Bankada Parlamentár Congresso Nacional da Reconstrução de Timor (CNRT) kestiona legalidade prosesu destituisaun atuál PPN Arão Noé de Jesus da Costa Amaral no eleisaun ba PPN foun, bele rekorre tuir dalan legál.

Deputadu Aniceto Guterres eleitu sai Prezidente Parlamentu Nasionál liuhosi votasaun sekretu iha sala plenáriu ho rezultadu maioria a-favór husi deputadu na’in-40, laiha abstensaun no kontra.

“Hakarak kestiona nia prosesu bele tuir dalan legál tanba nasaun ne’e adopta demokrátiku no rezultadu votasaun ohin nia mak deputadu na’in-40 no bankada sira seluk mós fó votu hotu,  la’ós de’it bankada tolu ne’ebé kria plataforma hanesan FRETILIN, Partidu Libertasaun Populár (PLP) no K’manek Haburas Unidade Nasionál Timor-oan (KHUNTO)”, tenik Aniceto Guterres hafoin eleisaun ba PPN foun iha Parlamentu Nasionál (PN), tersa ne’e.

Notísia Relevante: Aniceto Guterres Eleitu Ba PPN, PD Apoia ho Votu 4

Arão Noé Sei Hato’o Rekursu Ba Tribunál Rekursu

Iha parte seluk, atuál PPN, Arão Noé de Jesus da Costa Amaral, argumenta nia parte laiha koñesimentu ba rezultadu votasaun ohin nian no sei hato’o rekursu ba Tribunál hodi husu lia-loos.

Tuir Arão Noé, deputadu maioria mak halo eleisaun maibé ninia prosesu tenke tuir prosedimentu legál ne’ebé iha, tanba prosesu legál mak determina maioria ka minoria.

Maibé, tuir Aniceto Guterres votu maioria maka determina liuhosi plenáriu.

“Arão Noé la fó espasu ne’e buat ketak ida, situasaun hanesan ohin hatudu hadau malu podér iha Parlamentu Nasionál, tanba iha ne’e maioria mak manda no votu ohin maioria tanba deputadu sira fó votu 40. ne’ebé Parlamentu Nasionál labele hakruuk ba minoria”, nia akresenta.

Parte ida, Aniceto Guterres admite votasaun ohin iha lijitimidade tanba deputadu maioria fó votu a-favór.

“Arão Noe la fó fatin ne’e problema ninian, signifika ha’u iha lejitimidade liu tanba votu 40, se nia (Arão Noé) hela ho votu 24 ne’e nia laiha lejitimidade atu sai Prezidente Parlamentu Nasionál”, nia adianta.

Aniceto Guterres Sei Lidera Sesaun Plenáriu Dahuluk iha Kinta ne’e

Ho nune’e, atuál Xefe Bankada FRETILIN ne’e promete sei hala’o ajenda sesaun plenária dahuluk iha kinta ne’e, maibé antes ne’e sei konvoka uluk reuniaun líder Bankada Parlamentár hodi hala’o servisu efetivamente.

“Plenária tuir mai, ha’u mak sei lidera iha kinta ne’e, ha’u konvoka ona konferénsia líder bankada tanba fulan ida ona laiha konferénsia líder bankada no atividade Parlamentu Nasionál paralizadu”, nia salienta.

Kona-ba Meza PPN ne’ebé naksobu, Aniceto Guterres dehan kestaun ne’e aban tékniku sira sei hadi’a fali.

Husi rezultadu votasaun a-favór 40, maihusi Bankada FRETILIN 23, PLP 8, KHUNTO lima no Partidu Demokrátiku (PD) kontribui votu haat.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here