Vise Ministru Ba Dezenvolvimentu Estratéjiku Saúde, atuál Ministru Saúde Interinu, Bonifácio Maucoli dos Reis. Imajen/Egas Cristóvão

DILI,06 maiu 2020 (TATOLI)-Vise Ministru Estratéjiku Dezenvolvimentu Saúde, Bonifácio Maucoli dos Reis, hateten Governu aprova suplementu remuneratóriu ho valór $ 25 ba ekipa liña oin hodi atende kazu COVID-19 ne’e razuavel tanba konsidera Timor-Leste seidauk tama iha situasaun ida grave.

Ministru Saúde En Ezersisiu, Bonifácio Maucoli dos Reis hato’o asuntu ne’e hodi hatan ba preokupasaun hosi profisionál saúde sira-nian katak valór Suplementu remuneratóriu ne’ebé governu aprova la fó valór ba sira-nia servisu.

Tuir nia durante diskusaun iha Konsellu Ministru,membru governu sira diskute proposta suplementu remuneratóriu rua,maibé sira aprova maka proposta ho valór $ 25, $ 20 no $ 15.

“Dahuluk mak ita aprezenta hanesan $30 $40 $50, no daruak ita aprezenta $25 $20 $15,” afirma,Governante ba jornalista sira iha Edifísiu Ministériu Finansa Ai-Tarak-Laran Dili, kuarta ohin.

Ministru sira aprova proposta ne’e tanba sira konsidera Timor-Leste tama iha kazu transmisaun COVID-19 lizeira ka kma’an no seidauk tama iha kazu grave ne’ebé rejulta ema mate.

Notísia Relevante : Profisionál Saúde Sira La Satisfeitu ho Valór Suplementu Remuneratóriu

“Ita sei hasa’e subsidiu ne’e maibé faze ba faze mak hasa’e para orsamentu ne’e ita uza fali ba buat seluk la’ós atu haree mak ida ne’e de’it entaun agora ita la’o ho sitausaun ida akontese ne’e hanesan kazu lijeiru,” tenik Maucoli.

Bainhira Timor-Leste tama ona iha situasaun grave maka nia hateten Governu sei aumenta valór subsídiu ba ekipa servisu COVID-19.

Notísia Relevante :Governu Aprova Suplementu Remuneratóriu ba Profesionál Liña Frente Kada Loron $25

Governu liuhosi reuniaun Konsellu Ministru Estraordinária tersa (05/05/2020) aprova ona proposta Ministériu Finansa kona-ba suplementu remuneratóriu ba profisionál sira ne’ebé maka durante ne’e dedika sira nia-an hodi halo prevensaun ne’ebé ligadu ho transmisaun surtu coronavirus

Montante Ne’ebé prevee iha rezolusaun ne’e fahe ba kategoria tolu ho valór ne’ebé aplika ba profisionál sira konsidera liña frente kada loron $ 25.

Kategoria dahuluk ho valór $ 25 ba sira ne’ebé servisu iha izolamentu no laboratóriu, $ 20 ba sira ne’ebé iha kuarentena no mós $ 15 ba sira ne’ebé servisu administrativu ka sira ne’ebé apoiu maibé laiha kontaktu direta.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here