Mediku sira prepara hela hodi halo akompanamentu ba estudante no komunidade sira iha kurentena Tibar.Imajen/Antonio Goncalves

DILI, 06 maiu 2020 (TATOLI)-Profisionál Saúde sira la satisfeitu ho desizaun governu tanba aprova ona valór suplementu remuneratóriu ne’ebé maka la valoriza sira-nia kontribuisaun durante prevensaun surtu COVID-19 iha Timor-Leste.

Governu liuhosi reuniaun Konsellu Ministru Estraordinária tersa (05/05/2020) aprova ona proposta Ministériu Finansa kona-ba suplementu remuneratóriu ba profisionál sira ne’ebé maka durante ne’e dedika sira nia-an hodi halo prevensaun ne’ebé ligadu ho transmisaun surtu coronavirus.

Notísia Relevante :Governu Aprova Suplementu Remuneratóriu ba Profesionál Liña Frente Kada Loron $25

Reprezentante Profisionál Saúde ne’ebé destaka iha Otél Novo Horizonte, Evaristo Soares hato’o lamentasaun ne’e ba jornalista sira, iha Otél Novo Horizonte, kuarta ohin.

”Ha’u lori kolega médiku, profisionál saúde sira, seguransa no mós limpeza sira katak ami la satisfeitu ho desizaun Governu nian ne’ebé fó sai iha Konsellu Ministru no liuliu dadus sira ne’ebé mak aprezenta husi Ministériu Saúde ba iha Konsellu Ministru,” dehan Nia, kuarta ohin.

Montante Ne’ebé prevee iha rezolusaun ne’e fahe ba kategoria tolu ho valór ne’ebé aplika ba profisionál sira konsidera liña frente kada loron $ 25.

Kategoria dahuluk ho valór $ 25 ba sira ne’ebé servisu iha izolamentu no laboratóriu, $ 20 ba sira ne’ebé iha kuarentena no mós $ 15 ba sira ne’ebé servisu administrativu ka sira ne’ebé apoiu maibé laiha kontaktu direta.

Nia afirma, médiku sira konsidera valór ne’e la reprezenta dedikasaun servisu ne’ebé maka profsionál saúde oferese durante ne’e hodi prevene COVID-19.

”Ami servisu lahatene loron no lahatene kalan no ami servisu lahatene loron domingu ho sabadu, ami servisu oras 24 ami iha de’it terrenu maibé ami nia boot sira latun direta mai haree saida mak akontese iha ne’e,” Evaristo kestiona.

”Ita hotu oferese ita nia vida tantu profisionál saúde, seguransa, limpeza sira, inklui mídia sira ita hotu kontribui ba ida ne’e tanba ita-nia sidadaun no tuir idaidak nia kna’ar, tuir vokasaun ne’ebé ita idaidak hili ona,” nia argumenta tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here