Primeiru-Ministru, Taur Matan Ruak prezide reuniaun Konsellu Ministru, tersa (05/05) iha Salaun Ministériu Finansa, Aitarak-Laran. Imajen Tatoli/António Gonçalves

DILI, 05 maiu 2020 (TATOLI)Governu liuhosi reuniaun Konsellu Ministru (KM) estraordinária aprova rezolusaun ne’ebé aprezenta husi Ministra Finansa interina, Sara Lobo Brites kona-ba suplementu remuneratóriu ba profesionál sira ne’ebé durante ne’e dedika sira nia-an hodi halo prevensaun ligadu ho surtu COVID-19 iha Timor-Leste.

Montante ne’ebé prevee iha rezolusaun ne’e ba Ministériu Saúde (MS) fahe ba kategoria tolu no iha rezolusaun ne’e valór ne’ebé aplika ba profesionál sira ne’ebé konsidera iha liña frente kada loron $25.

Montante $25 ba kategoria dahuluk ba sira ne’ebé servisu iha Izolamentu no Laboratóriu, $20 ba sira ne’ebé servisu iha kuarentena no mós $15 ba sira ne’ebé serbisu administrativu ka sira ne’ebé apoiu maibé laiha kontaktu direta.

“Konsellu Ministru mós aprova rezolusaun ida ne’ebé mak aprezenta husi Ministériu Finansa kona-ba suplementu remuneratóriu ba profesionál sira tanba semana kotuk Prezidente Repúblika promulga ona Dekretu-Lei ne’ebé mak halo atribuisaun suplementu remuneratóriu ba ita-nia profesionál sira, entaun rezolusaun ne’e fixa ninia montante no mós períodu aplikasaun”, relata Sara Lobo liuhosi konferénsia imprensa iha Salaun Ministériu Finansa, Aitarak-laran, tersa ne’e.

Rezolusaun ne’e prodús efeitu hahú iha loron 28 marsu tanba bainhira COVID-19 ne’e hahú, profesionál saúde sira komesa hahú servisu no nia duransaun depende ba COVID-19 ne’e rasik, enkuantu mekanizmu ba  pagamentu sei hein ministériu sira ne’ebé elizivél tuir dekretu ne’e sira sei aprezenta funsionáriu sira-nia naran.

“Montante ne’ebé atribui depende ba lista prezensa no sertifikasaun hosi Sala Situasaun, tanba ne’e Primeiru-Ministru rasik husu ba membru Governu responsável ne’ebé mak iha área Defeza, Seguransa no Saúde atu iha sertifikasaun husi Sala Situasaun atubele atribui montante ba ema ne’ebé mak involve iha prosesu prevensaun no kombate COVID-19, tanba bele kria injustisa katak ema ne’ebé la diretamente involve maibé simu suplementu hanesan ho ema ne’ebé husik hela sira-nia família hodi dedika sira-nia tempu ba iha kna’ar ida todan ne’e”, esplika atuál Vise-Ministra Finansa.

Suplementu remuneratóriu ninia montante, Governu fixa tuir kategoria ne’ebé mak aprezenta husi Ministériu Saúde, Ministériu Defeza, Seguransa no sira seluk.

“Ninia montante fixa tuir kontaktu diretu ho moras COVID-19 ne’e, ezemplu izolamentu no laboratóriu sira iha kontaktu diretu ho pasiente COVID-19, entaun sira mak iha leten liu ho valór kada loron $25 no hotu-hotu tenke intende katak ne’e suplimentu remuneratóriu, ne’ebé kada fulan ema hotu manan saláriu maibé ne’e desizaun Governu nian atu rekoñese profesionál sira ne’ebé dedika sira-nia tempu tomak atubele atende moras refere”, nia adianta.

Sara Lobo salienta, bainhira hetan depende ba ministériu ida-idak mak tenke identifika sira-nia ema no mós lista prezensa tanba Governu selu kada loron.

“Ba motorista, forsa, defeza, imigrasaun, kuarentena, alfándega, no sira ne’ebé servisu iha  Fronteira, Aeroportu, Portu no Terrestre kada loron $15, ba pesoál agua no saneamentu, elétrisidade, limpeza, seguransa sivíl, no pesoál sira rekolla lixu kada loron $5”, nia akresenta.

Jornalista: Antónia Gusmão

Editora: Julia Chatarina

2 KOMENTÁRIU

  1. Boanoite .hau Nudar pesoal saude hakarak husu oinsa ho ami iha Baze . Servs iha Centro saude sra hetan orsamento oituan ga kae???tamba
    Ami durante EE ami servisu nafatin

HAKEREK NO HATÁN

Please enter your comment!
Please enter your name here