Imajen Tatoli/António Gonçalves

DILI, 16 marsu 2020 (TATOLI)—Reprezentante Povu iha Uma Fukun Parlamentu Nasionál husu ba Governu halo esplikasaun kona-ba orsamentu ne’ebé atu fó asisténsia ba vítima inundasaun.

“Agora importante liu mak Governu tenke iha orsamentu hodi fó apoiu ba vítima inundasaun sira iha kapitál Dili,” dehan Deputada FRETILIN, Nélia Menezes, iu hosi plenária Parlamentu Nasionál, segunda ne’e.

Nia husu ba Governu atu tau importánsia ba problema inundasaun ne’e tanba to’o agora vítima sira oras ne’e daudaun halerik hela.

Entretantu, Deputada FRETILIN, Maria Angélica Rangel, husu ba Ministra Finansa atu halo esplikasaun kona-ba montante orsametu iha fundu kontijénsia.

Tuir loloos, nia hatutan, ohin ne’e reprezentante povu iha iha PN debate ona osan iha ka lae. Klaru katak orsamentu laiha tanba parlamentu mak xumba orsamentu entaun agora ita ko’alia atu halo retórika.

“Loloos ne’e, ita husu Governu osan 2019 iha kontijénsia sei iha ka lae. Osan ida ba duodésimu ne’e sei iha ka lae, hodi bele atende situasaun emerjénsia hanesan inundasaun. Maibé ita ko’alia mak solidariza de’it,” dehan Deputada FRETILIN ne’e

Iha parte seluk, Xefe Bankada Parlamentár Partidu Demokrátiku, António da Conçeição hateten, parlamentu iha responsabilidade morál atu hatán ba situasaun emerjénsia liuliu atende vítima inundasaun sira.

“Governu mós tenke sente prioridade ida-ne’ebé mak presiza atu halo, ida-ne’e mak mútua hodi haforsa instituisaun sira. Ita la halo sedénsia sira-ne’e ba malu. Sé bele karik, ita parlamentu ne’e promove artigu 55 (rejimentu PN) hodi bolu governu saida mak presiza urjénsia ba nasaun, prevensaun ba coronavirus mós presiza osan, inundasaun mós presiza osan. Ne’e mak interese nasionál ita atu ko’alia ne’e,” dehan Deputadu Bankada Demokrátiku ne’e.

Entretantu, Deputadu PLP, Abel Pires da Silva, hato’o kondolénsia ba família balu ne’ebé lakon oan durante inundasaun iha kapitál Dili.

“Lori bankada PLP nia naran hato’o solidariedade ba vítima hotu-hotu inundasaun, populasaun besik rihun tolu resin mak afetadu, família besik atus-neen mak sai vítima. Uma barak hetan estragus, dokumentu barak lakon, barak lakon rikusoin hanesan karreta no motorizada. Ne’e dezastre ida mai ita. Tanba ne’e hato’o ami-nia solidariedade ba vítima sira hotu,” nia dehan.

Nia dehan, inundasaun ne’e la’ós rezulta de’it sasán uma laran maibé populasaun lakon sira-nia fonte rendimentu, lakon sira-nia negósiu hanesan kioske, restaurante, no alfaiate.

“Ha’u husu ita haree situasaun ne’e ho didi’ak. Ne’e situasaun ida-ne’ebé grave. Maibé ha’u agradese ba Governu Timor-Leste hanesan Ministériu Saúde, Sekretaria Estadu Protesaun Sivíl, parte Ministériu Obra Públika, liuliu señor Vise-Ministru Obra Públika nomos ekipa hosi IJE (Institutu Jestaun no Ekipamentu), CVTL no emprezáriu sira. Ha’u hakarak hato’o apresiasaun ba esforsu tomak inklui saida mak Maun Boot Kay Rala Xanana Gusmão halo iha Bidau,” dehan Deputadu PLP ne’e.

Biban seluk, Deputada KHUNTO, Olinda Guterers, husu governu fó prioridade ba vítima inundasaun sira iha kapitál Dili.

“Iha Hera, komunidade balun horikalan la-han. Ohin sira husu ha’u atu foti kestaun ne’e iha plenária. Ministru Obras Públika tenke ba haree vítima sira-nia sasán hetan estragu totál. Asuntu ne’e ha’u foti dalabarak ona maibé ministru ne’e la konsidera,” Olinda haktuir.

Hatán ba preokupasaun ne’e, Sekretáriu Estadu Komunikasaun Sosiál (SEKOMS), Mericio Akara, governu foti ona dadus balun kona-ba inundasaun ne’e.

“Primeiru-Ministru, Taur Matan Ruak fó orientasaun ba Ministériu Obra Públika no Sekretaria Estadu Protesaun Sivíl hareee problema inundasaun iha kapitál Dili,” nia hateten.

Notísia Relevante: PM Taur Orienta Membru Governu Rua Observa Vítima Inundasaun

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here