DILI,12 marsu 2020 (TATOLI)-Rezultadu Teste hosi Ospitál Darwin Austrália konfirma sidadaun Xile ida ne’ebé suspeitu ba coronavirus ka COVID-19, negativu.
“Ministeriu Saúde haruka ona amostra ba laboratóriu Austrália simu fali konfirmadu katak negativu ba Coronavirus. suspeitu ne’e agora kondisaun di’ak maibé tanba suspeitu ne’e sei iha sistomas no ita sei halo fila-fali tan teste segundu,’’informa, Vise Ministra kuidadu Saúde Primária, Elia dos Reis Amaral iha Konferénsia imprensa kinta (12/03/2020), iha Caicoli Dili.
Notísia Relevante :Sidadaun Itália Negativu ba Coronavirus
Governante ne’e dehan, ho rezultadu teste ba daruak ne’e maka Ministériu Saúde sei konfirma loloos suspeitu ne’e negativu ka positivu ba COVID-19.
Sidadaun Xile ne’e oras ne’e, iha hela fatin izolamentu, Maibé Vise Ministra Elia la esplika detaillu kona-ba fatin izolamentu refere ba Jornalista sira.
Notísia Relevante :Sidadaun Itália Asegura Hela iha Klínika STAMFORD MEDICAL LDA
Tuir informasaun provizóriu suspeitu ne’e sai hosi Timor-Leste hodi ba feriás iha Indonézia iha loron 29 fulan-fevereiru no iha loron 2 marsu kontinua ba Singapura depois fila hikas mai Timor-Leste iha loron 08 fulan-marsu 2020.
“Nia kontaktu direita ba pesoál saúde sira ne’ebé mak vizilánsia depois nia mós izola nia-aan rasik la kontaktu ho ema seluk to’o ami teste ba nia to’o rezultadu ami haruka ba Austrália no nia negativu hela no sidadun ne’e mane idade 30,”esplika Vise Ministra.
Ministeriu Saúde ho Organizasaun Mundiál Saúde sei kontinua halo monitorizasaun no supervizaun rutina ba situasaun saúde suspeitu nian no mós sei fó atendementu saúde ho di’ak liután.
Jornalista : Felicidade Ximenes
Editór : Agapito dos Santos
