Diretóra Jerál Prestasaun Saúde Ministériu Saúde (MS), Odete da Silva Viegas. Imajen Egas Cristovão

DILI, 09 marsu 2020 (TATOLI)-Ministériu Saúde ho Klínika STAMFORD MEDICAL LDA Mandarin Dili,  dadaun ne’e asegura hela sidadaun Itália ne’ebé suspeitu ba kazu coronavirus ka COVID-19 hodi hein resultadu teste hosi Ospitál Melbourne Austrália iha segunda (09/03/2020) lokoraik ohin.

Diretóra Jerál Prestasaun Saúde, Ministériu Saúde, Odete Viegas da Silva, hateten tuir loloos Ministériu Saúde ho liña ministeriál inklui Organizasaun Mundiál Saúde (OMS) iha domingo (08/03/2020) transfere ona suspeitu ne’e ba fatin isolamentu iha Suku Tibar, Postu Administrativu Bazartete, Munisípiu Liquiça.

Maibé la konsege tanba hetan impedimentu hosi Komunidade no Autoridade Lokál Suku Tibar.

“Ami mós halo koordenasaun ho pasiente ida ne’ebé mak agora daudaun iha ne’e tanba ema ne’e estranjeiru Nasaun Italianu ne’eb’e mak servisu iha Timor no hala’o nia viajén husi Itália mai Timor hahú iha loron 1 fulan-Marsu no loron 06 mak foin ba halo tratamentu iha STAMFORD hodi hetan sintomas makaas,”informa Odete Viegas ba Jornalista sira iha Caicoli Dili, ohin.

Nia dehan, Klínika STAMFORD MEDICAL indentifika pasiente ne’e ho sintoma isin manas 37,8 celciu iha loron 06 fulan marsu.

MS ho ekipa servisu prepara ona fatin isolamentu ba pasiente COVID-19  nomos fatin ba médiku sira iha domingo (08/03/2020) iha areadór Tibar.

“Hodikalan Profisionál Saúde mos prontu hotu ona atu halo servisu 24 oras no ami mós koordena ho segurans PNTL sira hahú ohin ba oin ne’e komesa seguransa másimu ona ba fatin iha Tibar atu nune’e ita mós kria kondisaun ba ema moras kria mos kondisaun ba profisionál saúde sira ne’ebé servisu iha ne’ebá inklui seguransa hamos rai no ema ne’ebé mak fornese hahan,”tenik tan.

Atu resolve disentendimentu ne’ebé maka iha, oras ne’e Ministériu Saúde liuhosi Departementu Formasaun  halo hela koordenasaun no fó advokasia ba lideres komunitária no komunidade iha Tibar kona-ba impaktu no transmisaun hosi coronavirus.

“Ami labele halo ami nia servisu tanba iha  impedimentu maihusi fatin hotu-hotu ita rekoñese karik ami tenki reforsa liu tán iha mekanismu husi komunikasaun no informasaun tanba ne’e mak dader ami kontanktu ona PNTL no FALINTIL-FDTL oinsá atu fó  seguransa ba fatin ne’ebe Governu prepara,”nia hatutan.

Odete dehan nia parte sei transfere suspeitu ne’e hafoin parte rua resolve ona disentendimentu ne’ebé maka mosu.

Jornalista : Felicidade Ximenes

Editór       : Agapito dos Santos

1 KOMENTÁRIU

  1. Se sidadaun ema italiano hanesan suspeito ba moras virus corona ne, husu ba governo se bele halo investigasaun( lasak) ema se-se mk nia kontak besik ba…..para hasil tes ne to mai mk nia positif, entaun governo bele halo intervensaun lalais. O bele karantina ema sira ne be halo nia relasaun besik ho ema sidadaun italiano ne.mk ne det ha nia sujestauun.

HAKEREK NO HATÁN

Please enter your comment!
Please enter your name here