Vise-Ministra ba Kuidadu Saúde Primáriu, Élia António de Araújo dos Reis Amaral. Imajen Tatoli/Egas Cristovão

DILI, 10 marsu 2020 (TATOLI)-Vise Ministra Kuidadu Saúde Primária Elia dos Reis Amaral relata, resultadu teste hosi Ospitál Darwin Austrália fó sai la deteta Sidadaun Itália sofre infesaun coronavirus.

Klínika STAMFORD MEDICAL LDA, iha Mandarin Dili maka dadaun ne’e asegura hodi fó tratamentu saúde ba sidadaun hosi nasaun Itália ne’e hahú kedas iha loron 06 fulan marsu to’o tersa ohin tanba mosu sintoma ho isin manas 37,8 celciu.

Notísia Relevante :Sidadaun Itália Asegura Hela iha Klínika STAMFORD MEDICAL LDA

“Ministériu saúde konfirma katak resultadu teste ne’ebé ita haruka ba laboratóriu iha Darwin Austrália depois halo analiza nune’e ohin lokoraik por volta tuku 04 oras de tarde Ministériu simu hikas resultadu negativu ba coronavirus,”dehan, Vise Ministra Elia iha Konferénsia Imprensa iha Caicoli.

Tanba ne’e, Vise Ministra kuidadu Saúde Primária husu populasaun hotu iha territóriu Timor-Leste atu labele pániku ho informasaun ne’ebé espalla iha públiku relasaun ho COVID-19.

Atu prevene hosi infesaun Coronavirus, Elia rekomenda ba populasaun atu fase liman ho sabaun, mear ka fani tenke taka ibun mantein distánsia metru ida ho ema ne’ebé kostupadu.

“Tein naan halo tasak maka bele han, husu ba maluk sira atu labele kumprimenta malu liuhosi kaer liman hodi evita moras ne’e iha ita-nia rai,”katak Ministra.

Ba Timoroan ne’ebé maka dadaun ne’e hetan sintoma hanesan mear, ulun moras, kakorok moras no isin manas makas tenke hakbesik lalais ba sentru Saúde, Postu saúde no Ospitál hodi hetan tratamentu saúde.

Jornalista  : Felicidade Ximenes

Editór        : Agapito dos Santos

HAKEREK NO HATÁN

Please enter your comment!
Please enter your name here