Jornalista sira halo entrevista ho Diretór Nasionál PCIC, Vicente Fernandes e Brito . Imajen/Egas Cristovão

DILI, 12 marsu 2020 (TATOLI)–Polísia Sientífika Investigasaun Kriminál (PCIC-sigla Portugés)  hala’o hela investigasaun hodi identifika autór ne’ebé mak fahe vídeo investigasaun kazu osan falsu iha rede sosiál Facebook.

Notísia Relevante : Investiga Kazu Osan Falsu, Ministru Filomeno Paixão Orienta PNTL Entrega Dokumentu Ba PSIK

Hosi Jakarta, Embaixadór Timor-Leste ba Indonézia, Alberto X. P. Carlos, informa katak, iha segunda semana fulan-janeiru 2020, embaixada simu duni informasaun katak ekipa  Polísia Nasionál Timor-Leste (PNTL) atu mai Jakarta hodi hamutuk ho ekipa Polísia Repúblika Indonézia  (POLRI) halo operasaun hodi kaer grupu ida, balun timoroan, tanba halo osan falsu.

Ekipa  PNTL to’o iha Jakarta komesa kedas halo operasaun ne’ebé dura kuaze loron 10 no hosi embaixada autoriza Adidu Seguransa, Júlio Hornai, atu extende apoiu nesesáriu maibé diskretu.

Embaixadór Alberto Carlos hatutan, hafoin operasaun termina, ekipa PNTL hamutuk ema na’in-tolu (3) ho sira-nia kolaboradór ida (emprezáriu timoroan) husu audiénsia atu hasoru Embaixadór hodi relata rezultadu operasaun.

“Sira informa katak ekipa konjunta PNTL-POLRI kaer ona Sr. Bruno Magalhães ho nia maluk na’in-3 ka 4. Balun timoroan ne’ebé hela iha Indonézia no balun Indonéziu no submete ona ba prosesu investigasaun POLRI,” haktuir Alberto Carlos.

Notísia Relevante : Bruno Magalhães ho Nia Grupu iha Hela Sela POLDA Metro Jaya

Relasiona ho deskonfiansa balun katak vídeo ne’ebé fahe iha Facebook  bele mai hosi ekipa PNTL nian ba Jakarta ne’ebé kompostu hosi membru PNTL na’in-tolu no emprezáriu timoroan na’in-ida ne’ebé envolve mós iha operasaun ne’e, Diretór Nasionál PCIC Vicente Fernandes e Brito, afirma katak, hosi parte PCIC seidauk bele fó-sai tanba sei segredu investigasaun.

“Daudaun ne’e PCIC halo hela investigasaun entermu iha medida prevensaun, tanba ita kuandu halo investigasaun to’o ikus prodús auto-notísia krime presiza duni  indísiu forte,” hateten  Diretór Nasionál PCIC Vicente Fernandes e Brito, hodi responde jornalista sira, ohin, iha nia servisu fatin, Edifísiu PCIC, Dili.

Nia informa mós katak, investigasaun sira-ne’e tenke rigór  atubele hetan faktu  hodi konstitui hanesan krime. Tanba ne’e, PCIC sei la-ko’alia  kona-ba boatu ka rumoris.

“PCIC la-ignora ho informasaun sira ne’ebé espalla iha rede  sosiál, maibé pro-ativu ho faze. Signifika, agora daudaun PCIC halo hela investigasaun no tempu ruma iha prova ne’ebé suporta ita-nia investigasaun sei halo auto-notísia krime,” afirma Vicente Fernandes e Brito.

PCIC hanesan órgaun superiór ba investigasaun kriminál ne’ebé iha kompeténsia hodi haree ba matéria krime organizadu no krime ekonomia finanseira, inklui kontratasaun moeda.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here