Ministru Defeza no Ministru Interiór Interinu, Filomeno da Paixão de Jesus ho Komandante Jerál PNTL, Komisáriu Faustino da Costa, esklarese kazu deskonfia prodús osan falsu ba Parlamentu Nasionál. Imajen Mídia MI

DILI, 10 marsu 2020 (TATOLI)–Ministru Defeza no Ministru Interiór Interinu, Filomeno da Paixão de Jesus, fó ona orientasaun ba Komandante Jerál Polísia Nasionál Timor-Leste (PNTL), Komisáriu Faustino da Costa, atu entrega dokumentu hotu ba Polísia Sientífika Investigasaun Kriminál (PSIK) hodi kontinua investiga kazu osan falsu.

Notísia Relevante : FRETILIN no PLP Konsidera Diskusaun Osan Falsu La Pertinente

Liuhosi audiénsia ho membru Parlamentu Nasionál (PN), ohin, Ministru Filomeno ne’ebé akompaña hosi Komisáriu Faustino da Costa, esklarese katak, kazu prodús osan falsu ne’e deskonfia envolve timoroan na’in-rua no sidadaun Indonézia balun ne’ebé autoridade Indonézia kaptura iha loron 18 janeiru 2020 iha Jakarta.

“PNTL tenke haruka dokumentu hotu-hotu ba PSIK para sira bele kontinua prosesu investigasaun ne’ebé nesesáriu,” klarifika  Filomeno da Paixão.

Razaun PNTL tenke entrega dokumentu ba PSIK mak investiga, tanba PSIK iha ninia natureza lei fó dalan atu investiga kazu sira ne’ebé deskonfia falsifika osan falsu no PSIK mós iha ekipamentu kompletu.

Filomeno mós klarifika ba deputadu sira karak vídeo ne’ebé oknum membru polísia balun fahe viral ona iha média sosiál Facebook hodi temi Líder Kay Rala Xanana Gusmão no Brigadeiru Jenerál F-FDTL, Mau-Nana nia laran ne’e la loos.

Notísia Relevante : Deskonfia, Polisia Balun Fahe Video Invetigasaun Ba Suspeitu Prodús Osan Falsu Iha Facebook

Komandu PNTL simu informasaun hosi Servisu Informasaun Polísia (SIP) iha loron 28 dezembru 2019 katak iha informasaun indikasaun ema no grupu balun halo atividade hodi envolve timoroan balun ba iha atividade ne’ebé deskonfia hanesan burla.

Iha loron 6 janeiru 2020, Komandu PNTL liga ho informasaun ne’ebé iha tenta koordena no atualiza situasaun ne’e bazeia ba akordu ne’ebé PNTL halo ho Polísia Repúblika Indonézia (POLRI) maka Komandu PNTL husu Autorizasaun ba Governu Timor-Leste hodi dezloka ekipa investigasaun envolve mós ema sivíl rua bá Indonézia hodi halo investigasaun ba kazu deskonfia prodús osan falsu ne’e.

Iha loron 19 janeiru 2020, ekipa ba hasoru malu ho POLRI iha Jakarta hodi hahú halo identifikasaun no rekolla kazu burla ne’e rasik no ikusmai rezultadu hatudu katak informasaun ne’e la loos.

“Vídeo ne’ebé sírkula iha mídia sosiál ne’ebé envolve membru PNTL balun, tuir ami-nia hanoin iha operasaun ne’e relatóriu temi de’it prátika burla agravadu no falsifikasaun tékniku dokumentu ami sente katak ita enfrenta krime barak loos. Iha investigasaun agora deskobre namanas hela hodi ita bele redús krime barak liután,” Ministru Filomeno Paixão hateten.

Nia afirma tan, Governu rasik tau hela atensaun hodi la tolera kualkér kazu krime falsifikasaun dokumentu, krime falsifika osan falsu, krime brankeamentu kapitál no fraude fiskál.

Filomeno hatutan, atu investiga kazu prodús osan falsu presiza rekursu no ekipamentu servisu ne’ebé bele ajuda servisu hodi konklui rezultadu ida pozitivu.

Nia husu ba deputadu sira atu labele rona kualkér informasaun falsu ne’ebé ema lansa iha mídia sosiál, tanba Governu rasik sei hein hela rezultadu hosi Tribunál Indonézia nian.

Governu Timor-Leste mós sei koordena ho Embaixada Timor-Leste iha Jakarta-Indonézia hodi akompaña nafatin prosesu investigasaun ba kazu prodús osan falsu ne’ebé deskonfia envolve timoroan na’in-rua.

Iha fatin hanesan, Komandante Jerál PNTL, Komisáriu Faustino da Costa, esplika kona-ba kazu deskonfia timoroan prodús osan falsu ne’e ninia prosesu investigasaun polísia Indonézia maka halo.

Faustino dehan, daudaun ne’e parte PNTL halo hela investigasaun mós ba membru investigadór polísia no ema sivíl na’in-rua ne’ebé arranka ba Indonézia to’o fila falimai hodi fahe vídeo ne’e sai viral iha mídia sosiál.

Investigasaun ne’e rasik Komandu PNTL envolve mós ekipa Ministériu Públiku no PSIK atubele fó sai rezultadu ida korretu.

Parte seluk, Komisáriu Faustino da Costa, esplika, durante tinan 2019 nia laran, PNTL mós simu keixa balun hosi timoroan balun kona-ba ema lori $100 falsu hodi sosa pulsa eletrisidade iha área Bairru-Pité nian no iha Munisípiu Manufahi mós akontese ema lori osan $20 tahan-hitu (7) hodi sosa sasán iha merkadu, maibé hosi prosesu investigasaun PNTL la konsege deskobre autór sira ne’ebé lori osan falsu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here