Primeiru-Ministru, Taur Matan Ruak, iha debate jeneralidade loron daruak iha uma fukun Parlamentu Nasionál. Foto António Goncalves

DILI, 10 marsu 2020 (TATOLI)—Bankada Parlamentár Frente Revolusionária Timor-Leste Independente (FRETILIN) no Partidu Libertasaun Populár (PLP) konsidera diskusaun ba osan falsu ne’ebé temi líder nasionál sira-nia naran la pertinente no bankada FRETILIN sai hosi sala plenária.

Bankada PLP, Deputadu Francisco Vasconcelos hateten, kazu ne’e loloos ne’e husik polísia halo investigasaun lai, la presiza halo diskusaun iha plenária Parlamentu Nasionál.

“Kazu ne’e la pertinente atu debate iha-ne’e (PN). Tanba, ha’u kontaktu ba Metro Jaya (Indonézia), kazu ne’e eziste duni no timoroan na’in-rua ne’e iha hela sela. Ajente polísia ne’ebé bá halo investigasaun tama ona ba prosesu disiplinár ne’ebé ke polísia na’in-rua ne’e fó-sai iha facebook. Agora Parlamentu bá politiza tiha depois ita mendahului. Mezmu líder bankada apresia maibé di’akliu retira. Lalika politiza sasán tanba kazu ne’e tama ona ba faze investigasaun,” dehan Deputadu Francisco Vasconcelos kestiona liuhosi plenária Parlamentu Nasionál, tersa ne’e.

Deputadu ne’e realsa, kazu ne’ebé deskonfia prodús osan falsu mak António Correia no Bruno Magalhães, tanba ida-ne’e husik polísia halo investigasaun.

“Ne’ebé, ita lalika kahor no politiza sasán. Sé de’it mak ko’alia iha facebook husik nia ko’alia. Ita mós husik polísia halo investigasaun. Se lae, ita mendahului instituisaun sira ne’ebé iha kompeténsia ba kazu ne’e. Kazu ne’e eziste la’ós duun de’it ema ruma, ne’e lae,” nia tenik.

Nune’e mós, Deputadu Bankada PLP, Abel Pires, konsidera diskusaun ho karáter urjénsia ba kazu prodús osan falsu ne’e serbisu polísia nian.

“Vídeo ne’ebé viral ita lori mai plenária ne’e la loos. Sé mak atu fiar vídeo ne’ebé temi ita-nia líder, ne’e la loos. Balun dehan osan falsu ne’e biliaun tolu kedas. Osan falsu hanesan ne’e trek 10 mós seidauk bele tula hotu, ne’e ema hotu hatene katak falsu,” nia haklaken.

Entretantu, Deputada Bankada CNRT, Carmelita Caetano Moniz hateten agora mak la tau importánsia ba kazu osan falsu ne’ebé halo viral iha facebook loron ida sei akontese fali ba líder sira seluk.

“Ita la tau atensaun másimu tanba ida-ne’e afeta ba ita-nia líder karizmátiku nasaun nian. Ne’e, ita-nia dignidade país nian. Agora ita la tau atensaun, loron ida sei akontese ba líder nasionál sira seluk. Tanba ne’e mak ita tenke prevene hodi fó atensaun sériu ba asuntu ida-ne’e,” Carmelita Moniz hatetetn.

Maibé, Vise-Xefe Bankada Parlamentár FRETILIN, Francisco Miranda Branco, husu ba Parlamentu Nasionál atu kansela debate kona-ba kazu osan falsu ne’e.

“Tanba asuntu ne’e iha hela segredu justisa iha nasaun viziñu nian, tanba ne’e ita lalika kahor polítika ho kazu sira hanesan ne’e,” nia sujere.

Hatán ba preokupasaun hirak-ne’e, Xefe Bankada Parlamentár CNRT, Duarte Nunes hateten, pedidu ne’e bankada CNRT mak husu atu debate ho karáter urjénsia no líder bankada sira mós konkorda.

“Tanba saida mak ami preokupa ho situasaun ne’e. Ami haree iha vídeo ne’e membru PNTL ne’ebé ba halo investigasaun iha situasaun sai iha facebook ne’e. Ema hotu hatene sira mak bá investiga hodi hetan dadus ba interese prosesu judisiál maibé realidade mak ne’e, dadus sai tiha públiku. Ami hakarak autoridade seguransa halo esplikasaun tanbasá mak dadus ne’e sai tiha ba mídia sosiál. Na’in ba instituisaun ne’e mak tenke esplika,” Duarte Nunes informa.

Kona-ba asuntu autoridade seguransa tenke halo esplikasaun iha PN, Ministru Defeza no Ministru Interiór Interinu, Filomeno Paixão de Jesus hatán, kazu ne’e sei iha prosesu justisa.

Molok kontinua ba diskusaun, Prezidente Parlamentu Nasionál, Arão Noé de Jesus da Costa Amarál deside halo votasaun liuhosi plenária. Rezultadu votasaun a-favór 30, kontra 28 no abstensaun 1.

Ho rezultadu votasaun ne’e, Bankada Parlamentár FRETILIN deside sai hosi plenária hodi la partisipa iha kontinuasaun debate ba asuntu ne’e.

Notísia Relevante: Líder Bankada Sira Aprova Debate ho Karáter Urjénsia Ba Akuzasaun Temi Líder Másimu

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here