DILI, 2 marsu 2020 (TATOLI)—Prezidente Conselho Diretivo Nacional Partidu Congresso Nacional de Reconstrucão de Timor (CNRT), Dionísio da Costa Babo Soares, rejeita akuzasaun ka kampaña iha internete kontra Partidu CNRT no liga ba CNRT ho ema prodús osan falsu ne’e la loos.
“Nu’udar Prezidente Conselho Diretivo Nacional Partidu Congresso Nacional Reconstrucão Timor (CDN-CNRT), ha’u rejeita maka’as akuzasaun falsu kona-ba CNRT nia ema balun prodús osan falsu ne’e. Ha’u husu ba públiku atu labele monu ba akuzasaun polítika ne’ebé halo hosi militante hosi partidu polítiku seluk hasoru CNRT,” Dionísio ba Agência TATOLI liuhusi rede sosiál, segunda ne’e.
Nia hatutan, partidu CNRT ka dirijente partidu sira laiha ema ida maka iha relasaun ho kriminozu sira. Nu’udar Prezidente CDN, nia husu atu entrega asuntu ne’e ba prosesu investigasaun ne’ebé la’o daudaun.
“Ema sira temi dirijente CNRT nia naran mós tenke investiga. Tanba ne’e nu’udar akuzasaun maibé halo kampaña polítika fo’er,” nia hateten.
Tanba, nia dehan, CNRT hamutuk nu’udar partidu ne’ebé tane aas interese nasionál, bazeia ba lei no konstituisaun no laiha ligasaun ho kriminozu sira.
“Husu ba kuadru partidu, militante no simpatizante CNRT nian atu fiar iha Xanana, fiar iha partidu CNRT. Lalika monu ba kampaña ho chantagem polítika ho ema ne’ebé laiha étika no morál halo liuhosi mídia sosiál,” nia esplika.
Jornalista : Evaristo Soares Martins
Editór : Cancio Ximenes
