Manu-Futu hamutuk 124 ne'ebé Alfándega halo apreensaun, dadaun ne'e tau hela iha Kuarentena Aeroportu Comoro. Imajen/Antónia Gusmão

DILI, 04 marsu 2020 (TATOLI) – Diresaun Nasionál Saúde Animál (DNSA) halo ona teste ka foti amostra husi Manu-Futu hamutuk 124 husi Rejiaun Administrativa Espesiál Oé-Cusse Ambeno (RAEOA), ne’ebé Autoridade Aduaneira (AA)/Alfándega halo apreensaun iha semana liubá iha Portu Dili tanba deskonfia mai husi nasaun Indonézia.

Diretór Nasionál Kuarentena no Bioseguransa, Venâncio Oliveira, informa katak sira foin simu rezultadu analiza laboratóriu ba amosta Manu-Futu.

“Ami simu ona rezultadu no hetan rezultadu negativu”, dehan Diretór Venâncio Oliveira ba Agência TATOLI iha ninia knaar fatin, Aeroportu Comoro, kuarta ne’e.

Diresaun Nasionál Veterinária Ministériu Agrikultura no Peska, liuhosi Departementu Diagnóstiku Veterinária iha loron 4 fevereiru ne’e, hasai ona rezultadu teste ba amostra manu lokál husi Oé-Cusse, Passabe.

Amostra ne’e rasik rekolla hamutuk 25 epidemiolojia ho métodu selesaun random no halo ona ezaminasaun ba moras Avian Influenza Virus (AIV) iha unidade serolojia (teste diagnóstika) katak husi totál amostra hamutuk 25 ne’e ho rezultadu negativu ka la hetan moras AIV.

Notísia Relevante: Kuarentena Asegura Ona Manu-Futu Husi Oé-Cusse Ne’ebé Alfándega Halo Apreensaun

Apreensaun Manu-Futu, DJ AA: “Ami Hetan Informasaun Husi Intelijénsia”

Kestaun ne’e hetan atensaun husi Prezidente Autoridade RAEOA, José Luís Guterres ‘Lugu’, tanba ne’e iha kuarta dader, Lugu hala’o vizita ba Diresaun Nasionál Kuarentena no Bioseguransa, iha Aeroportu Comoro hodi haree direta Manu-Futu sira ne’ebé lori husi komunidade Oé-Cusse na’in-ualu.

“Ohin Prezidente Autoridade mai la’ós atu mai interven ami nia servisu, maibé fó nafatin apoia ba desizaun saida de’it mak ami foti. Importante iha futuru nia sujere karik halo apreensaun di’ak liu halo iha RAEOA lalika to’o mai iha ne’e (Dili), tanba na’in ba manu sai abandonadu”, haktuir Venâncio Oliveira.

Direjente ne’e subliña, razaun prezensa Prezidente Autoridade RAEOA nian iha Kuarentena tanba na’in ba manu daudaun ne’e iha Dili no laiha família.

Manu-Futu hamutuk 124 daudaun ne’e funsionáriu kuaretena husu ona ba na’in-sira atu hasai hosi manu fatin hodi husik livre iha luhan no bele fó haan.

Jornalista: Antónia Gusmão

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here