Manu-Futu hamutuk 124 ne'ebé Alfándega halo apreensaun, dadaun ne'e tau hela iha Kuarentena Aeroportu Comoro. Imajen/Antónia Gusmão

DILI, 04 marsu 2020 (TATOLI) – Diretór Jerál Autoridade Aduaneira (AA)/Alfándega, José António Abílio, informa ekipa Alfándega halo apreensaun ba Manu-Futu husi Rejiaun Administrativa Espesiál Oé-Cusse Ambeno (RAEOA), bazeia ba informasaun husi intelijénsia ne’ebé serbisu hamutuk ho AA.

Diretór AA informa kestaun ne’e relasiona ho operasaun ne’ebé hala’o husi ekipa Alfándega iha madrugada 29 fevereiru no halo apreensaun ba Manu-Futu hamutuk 124 iha Portu Dili, tanba deskonfia mai husi Indonézia, maibé tanba konsidera hanesan sasan agríkola, daudaun ne’e asegura hela iha Diresaun Nasionál Kuarentena no Bioseguransa Ministériu Agrikultura no Peska (MAP) iha Aeroporto Comoro.

“Ami hetan informasaun hosi ami-nia servisu intelijénsia. Ami-nia intelijénsia ne’e la’ós iha Timór de’it maibé ami iha ligasaun ho Alfándega Indonézia ne’ebé ami sempre troka informasaun ba malu, kuandu iha informasaun ne’ebé maka tama relasaun ho atividade ilegál sira sempre informa mai ami. Tanba ne’e, bazeia ba informasaun hosi intelijénsia maka ami halo apreensaun”, tenik Diretór José António ba Agência TATOLI iha ninia knaar fatin, Palásiu Governu, kuarta ne’e.

Notísia Relevante: Kuarentena Asegura Ona Manu-Futu Husi Oé-Cusse Ne’ebé Alfándega Halo Apreensaun

Nia afirma, AA rasik iha diresaun ida hodi kontrola sasan illegál, tan ne’e liuhosi operasaun konjunta maka hetan Manu-Futu ne’ebé maka tama sein dokumentu.

“Relasiona ho manu ne’ebé mak halo apreensaun, Alfándega iha diresaun risku atu halo kontrolu kona-ba atividade ilegál, ne’ebé ho operasaun konjunta momentu halo iha patrullamentu no operasaun sira konsege hetan duni katak iha importasaun manu ne’ebé mak tama mai no laiha dokumentu. Kuandu laiha dokumentu Alfándega halo apreensaun, tanba merkadoria saida de’it mak tama mai, primeira pessoa halo inspesaun maka Alfándega, halo tiha inspesaun no haree tiha dokumentu iha ka laiha maka entrega ba Kuarentena”, nia akresenta.

Hafoin Alfándega halo apreensaun no haree dokumentu hotu, tanba sasan ne’e kompeténsia Kuaretena nian entaun halo auto-notísia ida hodi entrega ba Kuarentena.

“Tanba ne’e manu entaun kompeteténsia Kuaretena nian hodi haree manu ne’e bele lori tama ka lae, iha autorizasaun ka lae, Kuarentena maka tenke fó lisensa antes manu ne’e tama. Tanba ne’e daudaun ne’e iha ona Kuarentena,  ne’ebé ami hein atu hato’o fali informasaun mai ami ka atu halo partisipasaun ba Ministériu Públiku ne’e depende ba Kuarentena”, nia afirma.

Jornalista: Antónia Gusmão

Editora: Julia Chatarina

2 KOMENTÁRIU

  1. Manu-futu sira neé tama husi Oekusse, laos tama husi Atambua, karik apreensaun neé bele halo iha Batugade, laos iha Portu Dili. karik nuné entaun itaboot sira mos bele halo apreensaun ba manu sira neébe populasaun sira lori mai husi Suai ka Maliana, laos tahan manu mai husi Oekusse deit, ita boot sira mos bele tahan manu mai husi Atauro. Tanba saida maka la halo kedas apreensaun iha perbatasaun Indonesia neéba , tenke tahan fali iha Portu Dili, ida neé hatudu katak servisu intelijen Alfandega nian la masimu.

  2. Serbisu alfandega diak tebes,mas kuitado ita nia ema oecusse oan sira nb fila liman fan manu mai tama iha kapital Dili nee babain lao normal hela.
    supresa boot hare noticias ida nee,
    1.sera que sira labele faan resultado produtu veterinario husi povo oecusse nian mai iha kapital?
    2.hau sujere sei hakarak halo kontrolu ba animal diak liu halo kontrolu iha fronteira entre soe no oecusse hodi nunee labele izola povu oecusse ba nia aktividade ekonomia nian
    Abrasu ba imi hotu

HAKEREK NO HATÁN

Please enter your comment!
Please enter your name here