Manu-Futu hamutuk 124 ne'ebé Alfándega halo apreensaun, dadaun ne'e tau hela iha Kuarentena Aeroportu Comoro. Imajen/Antónia Gusmão

DILI, 02 marsu 2020 (TATOLI)–Diresaun Nasionál Kuarentena no Bioseguransa Ministériu Agrikultura no Peska (MAP) asegura ona manu-futu hamutuk 124 husi Oé-Cusse, ne’ebé maka Autoridade Aduaneira (AA) ka Alfándega halo apreensaun iha Portu Dili.

Manu-futu hirak-ne’e, lori mai husi Rejiaun Administrativa Espesiál Oé-Cusse Ambeno (RAEOA) bá Dili atu fa’an filafali, maibé hafoin to’o iha Portu Dili, Alfándega halo apreensaun tanba deskonfia mai hosi nasaun Indonézia.

“Situasaun ida-ne’e akontese iha loron 29 fevereiru 2020 madrugada, Alfándega halo apreensaun ba manu-futu hamutuk 124 tanba sira deskonfia mai hosi Indonézia. Tanba hanesan sasán agríkola, entaun entrega mai Kuarentena hodi asegura maibé haree filafali ba regulamentu jéral nian iha artigu 3 hateten katak seidauk bele halo inspesaun ba movimentu entre distritu ida bá distritu seluk, ho razaun ida-ne’e maka ami sei halo pareser tékniku ba Alfándega”, tenik Diretór Nasionál Kuaretena no Bioseguransa, Venâncio Oliveira ba Agência TATOLI iha ninia knaar fatin, iha Aeroportu Comoro, segunda ne’e.

Tuir dirijente ne’e, Alfándega iha ninia regra rasik katak sira bele foti medida ein-termu legalidade nian, maibé Kuarentena nota katak laiha prova manu sira-ne’e mai hosi nasaun seluk, nune’e mós Kuarentena iha Pássabe, RAEOA mós laiha informasaun kona-ba asuntu ne’e.

Venâncio subliña, Kuarentena iha Portu Mahata, RAEOA konfirma ona katak manu sira-ne’e mai hosi Oé-Cusse no atu mai fa’an iha Dili.

“Manu sira daudaun ne’e ami rai iha Kuarentena atu identifika ka diagnóstika kona-ba ninia saúde, tanba ne’e maka sira hosi Diresaun Nasionál Saúde Animál foti ona amosta raan hosi manu sira ne’e hodi halo analiza”, nia dehan.

Manu-futu hirak-ne’e, daudaun ne’e rai hela iha Kuaretena Aeroportu Comoro no parte Kuarentena autoriza ona na’in ba manu sira atu fó han no manu hirak-ne’e no haree ba kondisaun  manu sira sei saudável.

Manu hamutuk 124 ne’e, lori hosi Oé-Cusse oan na’in-ualu.

Diretór ne’e afirma, Diresaun Nasionál Kuarentena no Bioseguransa servisu bazeia ba Dekretu-Lei númeru 21/2003 kona-ba kontrola movimentu importasaun no esportasaun ba transporte navegasaun internasionál ninian no mós Dekretu Governu númeru 1/2016 kona-ba regulamentu jerál kuarentena nian ne’ebé atu kontrola no prevene movimentu merkadoria internasionál, liuliu ba produtu agríkola nian ne’ebé tama sai husi postu entrada fronteira Timor-Leste nian.

Parte seluk, na’in ba manu-futu, Octaviano Elu, senti triste tanba sasán ne’ebé lori la’ós hosi nasaun seluk, maibé mai hosi Oé-Cusse ho razaun katak atu mai fa’an iha Dili hodi sustenta ekonomia família, maibé to’o ikus hetan apreensaun.

“Ami mai husi Oé-Cusse, bainhira ami tun husi ró iha Portu Dili no hatún tiha manu hirak-ne’e, sira Alfándega haruka ami rai hamutuk manu sira-ne’e. Manu sira-ne’e ami sosa fali iha Oé-Cusse maka atu lori mai Dili hodi fa’an. Ami sente triste tebes tanba ami lori mai atu fa’an hodi hetan netik osan uitoan”, nia salienta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here