Primeiru-Ministru, Taur Matan Ruak, prezide reuniaun Konsellu Ministru iha Palásiu Governu, kuarta (04/03). Imajen TATOLI/Egas Cristovão

DILI, 04 marsu 2020 (TATOLI) – Governu liuhosi reuniaun Konsellu Ministru (KM) iha kuarta ne’e, aprova Projetu Dekretu-Lei ne’ebé aprezenta husi Sekretáriu Estadu Ambiente, Demétrio do Amaral de Carvalho, kona-ba eliminasaun importasaun no produsaun saku, embalajen, objetu plástiku no seluk tán.

“Diploma ida-ne’e, buka atu prevene no redús impaktu hosi rezíduu sira ba ambiente, liuliu rezíduu sira hanesan produtu plástiku ne’ebé ho utilizasaun únika. Nune’e, Dekretu-Lei prevee hodi bandu halo alienasaun, importasaun no produsaun produtu plástiku naun resiklável no bandu atu halo akizisaun, distribuisaun, importasaun no produsaun ba objetu plástiku ruma”, informa Ministru Reforma Lejislativa Asuntu Parlamentar, Fidelis Manuel Leite Magalhães hafoin reuniaun ezekutivu iha Palásiu Governu, kuarta ne’e.

Notísia Relevante: SEA Husu KM Re-ajenda Dekretu Lei Eliminasaun no Importasaun Saku Plástiku

HEINEKEN Entrega Saku Verde Husi Ai-Farina Hamutuk 5000 Ba SEA

SEA Prioritiza Prodús Lejislasaun Bandu Importa Saku Plástiku

Diploma ida-ne’e mos prevee atu oinsá estabelese prinsípiu fundamentál hirak hanesan prekausaun, prevensaun, dezenvolvimentu sustentável, seguransa ambientál globál, poluidór-pagadór, reutilizasaun no resiklajen no valorizasaun enerjétika.

Antes ne’e, SEA aprezenta diploma ne’e ba KM iha maiu 2019 maibé momentu ne’ebá ezekutivu sira seidauk iha desizaun tanba sei presiza informasaun adisionál.

Nune’e, bele prevene no hamenus impaktu husi rezíduu iha ambiente ambiente, no haree kle’an liu, prinsipalmente ba produtu plástiku sira ne’ebé la’ós resiklável hodi prevene no bandu atu fa’an, inklui importasaun husi determinadu objetu husi plástiku.

Kontiúdu Dekretu-Lei ne’e, hakarak estabelese prinsípiu fundamentál sira maka hanesan prekausaun, prevensaun ba dezenvolvimentu sustentável, seguransa ambientál globál, poluidór no re-utilizasaun no resiklajen no valorizasaun enerjétika.

Eliminasaun saku plástiku uzu úniku relasiona ho alternativu sira ne’ebé maka atu halo saku plástiku husi ai-farina, ne’ebé empreza balun intervene ona maibé alternativa seluk hakarak atu enkoraja empreza ki’ik sira hodi bele prodús husi matéria orgánika hanesan kohe, bote, saku sira ne’ebé bele halo ho matéria orgánika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here