Ambassador Portugal iha Timor-Leste, José Pedro Machado Viera ho Diretór Nasionál PCIC, Vicente Fernandes e Brito, hala'o termu asina hodi entrega ekipamentu reajente sira ba PCIC. Imajen/PCIC

DILI, 27 fevereiru 2020 (TATOLI)–Projetu Konsolidasaun Estadu Direitu Demokrátiku PALOP iha Timor-Leste (PACED-TL) ne’ebé finansia hosi Uniaun Europeia (UE) no realiza hosi Camões, I.P,  kinta ne’e, fó apoia ekipamentu laboratóriu ba Polícia Científica de Investigação Criminal (PCIC) iha área Biolojia ho Toksikolojia hodi halo teste forénsika.

Notísia Relevante : Governu Kontinua Kapasita Rekursu PCIC Kombate Krime Organizadu

Serimónia termu entrega ekipamentu hirak-ne’e oferese direta hosi Embaixadór Portugal iha Timor-Leste, José Pedro Machado Vieira ba Diretór Nasionál PCIC, Vicente Fernandes e Brito no Xefe Laboratóriu PCIC Mónica Menezes, iha edifísiu PCIC, Caicoli, Dili.

Vicente Fernandes e Brito,  diretór nasionál PCIC, lori instituisaun ne’e nia naran hato’o agradese ba Uniaun Europeia nia apoiu ho sentidu solidariedade hodi dezenvolve no reforsa liután servisu PCIC nian.

Nia hateten, laboratóriu ka reajente ba área rua ne’e oinsá deskobre ema nia ran, teste DNA, droga no krime sira ne’ebé iha relasaun ho tráfiku estufa pasiente ho droga ninian ne’ebé sai preokupasaun ba Estadu no nasaun.

Vicente Fernandes e Brito subliña, apoiu ne’e importante tebes liuliu oinsá reforsa kapasidade laboratóriu ba PCIC hodi hala’o nia servisu rekolla, identifika no realiza ezame forénsika.

“Investigasaun ida, ita laiha siénsia forénsika nia intervensaun entaun investigasaun ida sei ne’e laiha folin no ita la konsege deskobre ajente krime no la konsege deskobre verdade lia-loos ba krime sira ne’ebé loron-loron ema ko’alia krime organizadu, krime ho kompleksidade boot, krime sira ne’ebé nia espansaun la koñese fronteira, no krime omisídiu oho ema, violasaun sexuál,” tenik Vicente Fernandes e Brito.

Biban ne’e, Embaixadór Portugal iha Timor-Leste, José Pedro Machado Vieira, hateten, realizasaun ba apoiu ekipamentu hirak-ne’e tanba iha ámbitu projetu liuhosi kooperasaun Uniaun Europeia ho país Afrikanu, língua Portugeza no Timor-Leste ho objetivu atu konsolida Estadu direitu demokrátiku, oinsá luta hasoru krime organizadu, krime brankeamentu kapitál, krime tráfiku droga no sira seluk tan.

Dezde estabelese PCIC iha tinan 2015, Uniaun Europeia mós fó ona apoiu lubuk, hanesan formasaun ba investigadór no espesialista iha rai-laran no iha polísia judisiáriu Portugal no atribui mós laboratóriu móvel no reajente sira seluk tan.

Notísia Relevante : MJ Dezafia PCIC Investiga Kazu Krime Droga

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here