Logotipu PCIC

DILI, 14 maiu 2019 (TATOLI)—Ministériu Justisa kontinua buka koopera ho doadór sira hodi kontinua fó kapasitasaun rekursu umanu ba ekipa membru Polícia Científica de Investigação Criminal (PCIC) iha área investigasaun kriminál no administrasaun.

Ministru Justisa, Manuel Cárceres dehan, kapasitasaun ne’e ho objetivu rekursu PCIC bele iha koñesimentu kle’an halo investigasaun ba kazu krime organizadu oioin ne’ebé akontese iha Timor-Leste.

“Ha’u hakarak intelektuál PCIC tenki sai matenek atu interpreta lei ho loloos no tenki iha kapasidade téknika no investe sira nia naran hodi halo servisu ho di’ak liuhusi formasaun,” dehan Manuel bainhira partisipa iha selebrasaun aniversáriu PCIC ba dala V (15 maiu 2014-15 maiu 2019) iha salaun enkontru Ministériu Solidariedade Sosiál Inkluzaun (MSSI), ohin.

Nia informa katak PCIC hahú harii ho dezafiu no agora iha rekursu sufisiente atu bele hala’o ninia kna’ar buka uza ekipamentu modernu deteta kazu asinatura dokumentu falsu no problema asinatura falsu ne’ebé iha kazu krime organizadu sira.

Agora dadaun, nia haktuir, governu Xina mós sei fó apoiu ekipamentu teste DNA (Deoxribo Nucleic Acid) ba PCIC buka hatene deteta problema kazu sira hanesan aman  nega nia oan, bele foti de’it oan nia raan hodi justifika lia loos hosi teste DNA.

“Mákina teste DNA, ha’u haree modernu tebes. Se aman ida nega nia oan, ba de’it tribunál hasai oan nia raan bele hatene ona labarik nia aman mak sé,” nia esplika.

Ministru ne’e hatutan, ho laboratóriu DNA ne’ebé PCIC iha presiza kapasita rekursu PCIC sai espesialista ba teste DNA.

Tuir polítika governu, nia hateten, sei koloka membru PCIC ba tuir formasaun área oioin iha Portugál, Xina, Japaun no nasaun seluk-tan.

Fatin hanesan, Diretór Nasionál PCIC, Vicente Fernandes e Brito dehan ho ezisténsia tinan lima, PCIC presiza hetan apoiu formasaun hodi kapasita membru sira iha área investigasaun ba krime.

Nia fó ezemplu, atu kombate krime subernétika (cybercrime) presiza duni rekursu kualifikadu domina iha área teknolojia.

“Atu kombate krime subernétika (cybercrime) ne’e prosesu ida la fásil. Ita presiza rekursu,” nia afirma.

Durante PCIC harii to’o konsege rejistu kazu krime ne’ebé aas liu. Tuir estatístika hosi PCIC tinan 2015, rejista kazu hamutuk 65 no kazu aas liu maka burla agravadu hamutuk 15.

Iha tinan 2016, nia salienta, PCIK rejista kazu hamutuk 199 no kazu aas liu mak burla agravadu 33 no tinan 2017 rejista kazu hamutuk 134 no kazu aas liu maka burla agravadu iha 24 no tinan 2018 rejista kazu  hamutuk 206 no kazu boot liu falsifikasaun dokumentu hamutuk 41.

Hosi kazu hirak ne’e ekipa PCIC investiga no prosesa kazu ida-idak hodi haree tuir natureza akontesimentu hodi prosesa tuir lei.

To’o ogora, Vicente haklaken, PCIC ho totál membru 45 nu’udar investigadór no investigadór estajiáriu hamutuk 30, fahe ba unidade oioin. PCIK iha mós péritu forénsiku agregadu 30 nomós iha laboratóriu polísia sientífika.

Durante ne’e, Vicente haklaken, péritu forénsiku na’in 16 mak hetan ona formasaun iha Portugal kona-ba Cena de Crime e Lofoscopia, no péritu forénsiku na’in 5 mós tuir formasaun iha Portugál  kona-ba área dokumentu nian.

Aleinde ida ne’e, PCIC mós iha péritu forénsiku 4 tuir ona formasaun iha Portugál iha Toxicologia no péritu forénsiku na’in 5 tuir ona formasaun kona-ba balístika.

Tuir nia katak PCIC presiza aumenta rekursu kualifikadu iha Unidade Apoiu Investigasaun Kriminál hanesan Departamentu Armamentu no Seguransa (DAS), Laboratóriu Polísia Sientífika (LPS), Departamentu Interpol (DI), Departamentu Sentrál Investigasaun Kriminál (DSIK), Departamentu Apoiu (DA) no seluk-tan.

PCIC kria hosi dekretu lei númeru 15/2014, loron 14 maiu, ho alterasaun introduzida hosi dekretu lei númeru 21/2014, loron 6 agustu, nu’udar órgaun auxiliár administrasaun justisa ne’ebé atu iha dependénsia funsionál Ministériu Públiku no Korpu Superiór Polísia Kriminál iha dependénsia orgánika direta ba Ministru Justisa.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here