Ministru Justisa, Manuel Cárceres da Costa. Imajen/António Gonçalves

DILI, 23 agostu 2019 (TATOLI)- Ministru Justisa (MJ) Manuel Cárceres da Costa, ohin,  fó pose ba investigadór kriminál husi Polisia Sientífika Investigasaun Kriminál (PCIC-sigla portugés) na’in 30.

Notísia Relevante : Kazu Barak Tribunál Anula Tanba Fraku iha Investigasaun

Investigadór sira ne’e kompostu husi feto na’in neen (6) no mane na’in 24, hafoin  sira kompleta segundu kursu investigasaun nian besik tinan ida iha Portugál.

Serimónia pose hala’o liuhusi termu juramentu husi Ministru Justisa, Manuel Cárceres ne’ebé akompaña mós husi reprezentante Komisaun Funsaun Publiku (KFP) ne’ebé hala’o iha edifísiu Ministériu Solidariedade Sosiál no Inkluzaun (MSSI), Caicoli, Dili.

Ministru Manuel Cárceres dezafia investigadór sira ne’e atu eleva papél ho responsabilidade hodi rigor iha investigasaun ba kazu droga no brankamentu kapitál (fase osan).

“La’ós ona novidade ba ita katak, Timor-Leste sai fatin tránzitu ba droga no la’ós ona novidade foun, osan barak maka tama iha Timor. Brani hatete ita nia kondisaun, katak brani atu luta hasoru kondisaun sira ne’e,”  afirma Ministru Manuel Cárceres.

Ministru husu ba enposadu sira atu uza rekursu ne’ebé iha hodi hala’o servisu ajuda Ministériu Públiku prosesa kazu sira ne’ebé iha atu ajuda prosesa rezolve problema judisiáriu iha Timor-Leste.

“Ita nia rain iha krime organizadu oin-oin, nu’udar Timoroan tenke hakas-aan buka dalan oin-oin atu redús krime organizadu barak iha ita nia rain,” afirma Manuel Cárceres.

Nia dehan, governu sei kontinua kapasita nafatin ekipa PCIC hodi hala’o knaar ho profisionál liután hodi hasa’e sira nia kapasidade intelektuál hodi fó susesu ba servisu PCIC.

Ministru Justisa, Manuel hato’o agradese ba Governu Portugál ne’ebé kontinua apoiu formasaun ba hasa’e koñesimentu investigadór PCIC nian.

Iha fatin hanesan, Diretór PCIC Vicente Fernandes Brito fó parabéns ba enposadu investigadór sira ne’e, tanba simu ona formasaun barak iha Portugál no sira fila mai estájiu iha TL no simu pose nu’udar investigadór kriminál.

Nia dehan, formasaun ne’ebé investigadór na’in 30 hala’o iha Portugál  la’ós ba de’it área kriminál nian, maibé formasaun ba área jerál ne’ebé fó husi instrutór Polisia Judisiáriu Portugál hodi kapasita  membru PCIC.

“Formasaun ida ne’e ita kombina teoria no pratika. No buat sira ne’ebé sira simu husi Polisia Judisiáriu Portugál besik tinan ida,” nia informa.

Vicente espera ho rekursu investigadór sira ne’e bele reforsa servisu PCIC di’ak liután atu investiga kazu sira ne’ebé Ministériu Públiku aprezenta ba PCIC.

Nia dehan, mensajen Ministru, Manuel hodi dezafia PCIC investiga kazu krime droga no kazu fase osan ne’e nu’udar dezafiu todan ne’ebé PCIC prontu atu hala’o knaar ne’e ho responsabilidade.

Durante hala’o knaar PCIC simu ona kazu lubuk ida ne’ebé rejista hamutuk 660 liu kompostu husi kazu krime oin-oin.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here