Bandeira TL ho Austrália. Imajen: google

DILI, 27 fevereiru 2020 (TATOLI)–Nasaun Membru Fórum Rejionál ba Organizasaun Sudeste Aziátiku (ARF-sigla inglés) hamutuk 27 ohin realiza semináriu Internasionál ida iha Dili hodi diskute kona-ba esperiénsia Timor-Leste ho Austrália tanba konsege ona rezolve sira-nia liña Fronteira Marítima iha tinan 2019.

Timor-Leste (TL), Austrália ho Malázia maka sai uma-na’in ba fórum ARF tinan 2020 iha Dili ne’ebé hala’o durante loron rua hahú 27-28 fevereiru 2020.

Notísia Relevante :Nasaun 27 Partisipa Reuniaun ARF iha Dili

“Semináriu ne’e sei foti ezemplu hosi esperiénsia rejionál sira no mós hosi péritu akadémiku sira no ezamina kazu anteriór sira liu-liu mak Timor-Leste ho Austrália nian prosesu konsiliasaun  hodi estabelese fronteira marítima permanente liuhosi komisaun konsiliasaun,” esplika komunikadu imprensa ne’ebé TATOLI asesu hosi Ministériu Negósiu Estranjeiru no Kooperasaun (MNEK), ohin.

Tanba, TL ho Austrália nu’udar nasaun dahuluk ne’ebé uza dalan konsiliasaun hodi rezolve sira-nia ketan tasi no asina ona iha loron 30 fulan-agostu 2019.

Notísia Relevante :Eventu ARF Diskute Kestaun Seguransa No Defeza Nível Multilaterál

ARF hanesan Fórum Konsulativu Rejionál ida kompostu hosi nasaun partisipante hamutuk 27 hodi buka halibur ideia kona-ba asuntu seguransa iha rejiaun Sudeste Aziátiku.

Nasaun Membru ARF hirak-ne’e kompostu hosi Austrália, Banglades, Brunei Darussalam, Cambodia, Canadá, Uniaun Europeia, Índia, Indonézia, Japaun, Laos, Malázia, Mongolia, Myanmar, Nova Zelándia, Pakistaun, Papua Nova Guiñe, Filipina, Rusia, Singapura, Korea Súl, Srilanka, Thailándia, Estadu Unidu Amérika, Vietname inklui Timor-Leste.

Notísia Relevante :Nasaun Membru ARF Partilla Esperiénsia Rezolve Konflitu Iha Timor-Leste

Timor-Leste sai ona membru ARF  ativu no sai mós ona uma-na’in ba semináriu ARF  hahú ona iha 2011, 2017 no 2019. Hosi prosesu hirak-ne’e maka sei haforsa Timor-Leste nia prosesu aplikasaun ba adezaun iha ASEAN.

Jornista: Hortencio Sanchez

Editór   : Agapito dos Santos

HAKEREK NO HATÁN

Please enter your comment!
Please enter your name here