Membru ARF sira ne´ebé partisipa eventu ARF iha Timor-Leste. Imagen/António Gonçalves

DILI, (TATOLI) – Nasaun membru Fórum Rejionál ba Organizasaun Sudezte Aziátiaka (ARF-sigla inglés) hamutuk 27 inklui Timor-Leste partilla esperiénsia atu hakle’an no hametin entendimentu no komprensaun kona-ba prinsípiu sira iha diplomasia preventiva ARF nian.

Nune’e mós esplora forma sira ne’ebé bele hametin kapasidade atu prevene eskalaun konflitu rejionál liuhusi destakamentu mekanizmu alerta sedu no responde.

“Partilla ho ita kona-ba sira-nia esperiénsia, sira-nia matenek kona-ba diplomásia preventiva i oinsá alerta sedu atu rezolve konflitu sira ne’ebé mak ita hasoru.  Oportunidade ne’e kada país sei ko’alia kona-ba sira-nia esperiénsia rasik ne’ebé mak sira halo iha ne’ebá”, katak Diretór Jerál Asuntu ASEAN, Jorge Trindade Neves Camões, ba jornalista sira iha Otél Novo Turizmu, Lecidere, kuarta (24/4).

Timór mós sei aproveita oportunidade ne’e, partilla esperiénsia oinsá prevene konflitu sira ne’ebé mak mosu.

“Idaidak sei fahe esperiénsia, matenek, atu nune’e ita hamutuk oinsá bele prevene konflitu atu labele sai eskala ne’ebé boot”, refora tan Diretór Jorge Camões.

Nia afirma soru-mutu ne’e atu prevene, evita konflitu sira, nune’e komunidade iha rejiaun ne’e bele moris hakmatek.

Iha eventu internasionál ne’e, Organizasaun Naun-Governamentál (ONG) Belun, iha mós oportunidade hodi fahe esperiénsia kona-ba sira-nia envolvimentu iha sosiedade atu prevene konflitu iha munisípiu sira.

Eventu ne’e prezide husi Timor-Leste no kó-prezide mós husi Indonézia nomós Estadu Naklibur Amérika (EUA-sigla inglés) no Eis-prezidente Repúblika, José Ramos Horta, iha okaziaun hala’o mós diskursu prinsipál perante país membru ARF sira.

Eventu internasionál ne’e sei hala’o durante loron tolu, hahú ohin to´o 26 abril.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here