Kazál Timoroan, José Soares Pereira no Angela Soares, hakuak sira nia-oan ho tanis, hafoin rona desizaun finál iha Tribunál Atambua, Indonézia, kuarta (26/02/2020). Imajen/Eugénio Pereira

ATAMBUA, 26 fevereiru 2020 (TATOLI)- Tribunal Distritál Atambua, ohin, hola desizaun final ba kazu droga ne’ebé envolve kazál Timoroan; José Soares Pereira (34) ho nia kaben Angela Soares (30) ho pena prizaun tinan 10 ba José Soares no tinan lima (5) ba Angela Soares.

Notísia Relevante : Kazál Timoroan ba Kazu Droga: “Ami Vítima no Inosente”

Xefe Koordenador Badan Narkotika Nasional (BNN) Atambua,Komisariu Polisia, Apolio da Silva, fó korajen ba kazal Timoroan atu simu desizaun Tribunal Atambua nian. Imajen/Eugénio Pereira

Hafoin liu prosesu audiénsia julgamentu ba dala-16 ne’e, Tribunal Atambua liuhusi juiz koletiva A.A Gede Susila, P, Gustav Bless Kupa ho Sisera S.N. Nenohayfeto, foti desizaun ne’e bazeia ba faktu komprovativu ne’ebé aprezenta hosi Ministériu Públiku  Atambua ne’ebé reprezenta hosi Prokuradór Andi P. Wicaksono.

Arguidu na’in rua fen-la’en nu’udar sidadaun Timorense ne’e kondena ho artigu. 114 alínea (2), artigu 113 alínea (1), artigu 114 alínea (2) UU RI númeru 35, tinan 2009 kona-ba Narkótika junta ho artigu 55 kódigu prosesu penál (KUHP) alínea (1) ba-1, tanba tenta lori droga tama Fronteira Motain, Atambua-Indonézia, ho totál musan 4.874 ne’ebé Autoridade Seguransa (Beacucai) halo apreensaun (foti) iha mákina imprime Epson mutin nia laran iha 29 maiu 2019.

Notísia Relevante : Advogadu Ba Kazál Timoroan La Simu Akuzasaun Prokuradór Atambua

Juiz A.A Gede Susila P, klarifika katak, sentensa prizaun efetivu ne’e tun hafoin parte ekipa halo estudu no analiza ba akuzasaun hosi parte prokuradór no haree mós deklarasaun pledoi ne’ebé aprezenta hosi parte defeza  Jemmy Haekase, ne’ebé fasilita asisténsia legal ba arguido kazál Timoroan ne’e inklui sasin sira.

Juiz mós fó tempu ba kazál Timoroan atu koordena ho parte advogadu karik la simu desizaun bele halo rekursu durante loron hitu (7) nia laran.

“Bazeia ba lei ne’ebé iha maka Tribunál kondena arguidu, José Soares Pereira ho pena prizaun tinan 10 no selu multa Rp.1,000,000,000. Bainhira arguidu la selu multa maka sei aumenta pena prizaun tinan ida tan,” deklara Juiz A.A Gede Susila P.

Ba Arguida Angela Soares,  Tribunál  Atambua kondena ho pena prizaun efetiva  tinan lima (5) no selu multa Rp.1,000,000,000. Bainhira arguida la selu multa ne’e maka sei aumenta pena prizaun  tinan ida tan.

Tuir observasaun Ajénsia Tatoli nota, desizaun ne’e halo arguidu, José Soares Pereira no Angela Soares ne’ebé akompaña hosi sira nia família triste no hamonu mata-wen  iha Tribunal laran.

Defeza kazál Timoroan ne’e,  Jemmy Haekase akompaña husi, Konsuladu Timor-Leste ba Kupang, Jesuino dos Reis Matos “Zito” no Konsuladu Timor-Leste ba Atambua, João Simão Sousa, no akompaña mós hosi Diretór Asuntu Konsuladu, Hermínio Pinto  no Xefe Koordenadór Badan Narkotika Nasional (BNN) Atambua, Komisáriu Polisia, Apolio da Silva hasoru malu ho kazál rua hodi kontinua motiva atu simu desizaun ne’e tuir lei Indonézia nian.

Advogadu, Jemmy Haekase, promote uza tempu loron hitu koordena ho konsuladu Timor-Leste inklui nia kliente rua para bele hanoin prosesu atu halo rekursu ou lae.

Advogadu Jemmy sente orgullu no agradese ba desizaun juis koletivu hodi hatún pena prizaun nia kliente na’in rua menus hosi tinan 20.

Iha parte seluk, reprezentante família, Cipriano Soares, deklara, família nia parte simu desizaun ne’e, maibé husu ba Estadu Timor-Leste no parte advogadu bele halo esforsu atu halo rekursu ba desizaun primeira instánsia nian.

“Hanesan família ami sente todan. Ami família entrega tomak desizaun ba governu ho advogadu bele buka solusaun,” hateten Cipriano Soares.

Konvida Prokuradór Atambua Vizita TL  

Konsuladu Timor-Leste ba Kupang, Jesuino dos Reis Motas “Zito” no
Konsuladu Timor-Leste ba Atambua, João Simão Sousa akompaña hosi Diretór Asuntu Konsuladu, Herminio Pinto, akompaña prosesu julgamentu ba kazu kazál Timoroan iha Tribunál Distritrál Atambua, kuarta (26/02/2020). Imajen/Eugénio Pereira.

Iha fatin hanesan, Konsuladu Timor-Leste ba Kupang, Jesuino dos Reis Matos “Zito” dehan, governu agradese ho desizaun finál hodi hatún pena ba kazál Timoroan ne’e.

“Ho grasa Maromak ita agradese ohin desizaun finál bele hatún pena  ba ita alin José tinan 10 no Angela tinan 5, soke osan maka selu multa Rp.1000,000 ba sira na’in rua ne’e sei haree tanba sira na’in rua sai vítima,” afirma Zito.

Nia dehan, governu sei koordena ho advogadu sei hanoin durante loron 7 sei halo rekursu ba tribunál bele hamenus pena ho razaun kazál Timoroan la’ós na’in ba ai moruk droga ne’e.

Konsuladu Zito dehan, sira sei konvida prokuradór no juiz Atambua atu ba Timor-Leste hodi rona mós evidénsia balun ne’ebé prokuradór sira rekolla hosi arguidu Jerry ne’ebé lasu kazál Timoroan lori droga tama ba area jurizdisaun Indonézia nian.

Iha parte hanesan, Xefe Koordenadór Badan Narkotika Nasional (BNN) Atambua, Komisáriu Polisia, Apolio da Silva dehan, nia sente triste ba kazál Timoroan nu’udar vítima no  inosente ne’ebé ema estranjeiru sira uza hodi lori droga husi Timor-Leste tama ba Indonézia.

Nia dehan, kazu ne’e sai referénsia ba joven Timoroan sira tenke matan moris atu labele sai vítima, liu-liu la koñese ema ruma atu haruka sasán tenke kuidadu-aan para labele monu ba lasu no sai vítima.

Apolio dehan, tuir nia haree kazál Timoroan ne’e la sala no inosente ba prosesu, tanba na’in ba droga maka sidadaun Filipina, Jerry ne’ebé kastigu ona iha prizaun  Becora-Timor-Leste.

Hafoin audiénsia julgamentu, autoridade seguransa sira lori kedas kazál Timoroan ba prizaun.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here