Konsuladu Timor-Leste ba Kupang, Jesuíno dos Reis Matos “Zito” ho Konsuladu Timor-Leste ba Atambua, João Simão Sousa, konversa ho kazál Timoroan JPS no AS iha Tribunál Distritál Atambua Indonézia. Imajen/Eugénio Pereira

ATAMBUA, 21 fevereiru 2020 (TATOLI)- Kazál Timoroan ho inisiál JSP ho AS ne’ebé lori droga ba Kupang, Indonézia, ho arrepende husu deskulpa hodi mantein sira nia deklarasaun nu’udar vítima no inosente.

Notísia Relevante : Advogadu Ba Kazál Timoroan La Simu Akuzasaun Prokuradór Atambua

Konsuladu Timor-Leste ba Kupang, Jesuíno Dos Reis Matos “Zito” no Konsuladu Timor-Leste ba Atambua, João Simão Sousa akompaña husi Diretór Asuntu Konsuladu, Hermínio Pinto akompaña prosesu julgamentu ba kazu kazál Timoroan JPS no AS iha. iha Tribunál Distritál Atambua, kinta (20/02/2020). Imajen/Eugénio Pereira

Arguidu JSP ho AS  hato’o deklarasaun ne’e ho tanis durante hasoru malu minutu balun ho Konsuladu Timor-Leste ba Kupang, Jesuino dos Reis Matos “Zito” ho Konsuladu Timor-Leste ba Atambua, João Simão Sousa akompaña husi Diretór Asuntu Konsuladu, Hermínio Pinto, ho família sira, hafoin asiste julgamentu ba kazu ne’e  iha Tribunál Distritál Atambua, kinta (20/02/2020).

“Ami husu deskulpa ba señor konsuladu sira no ami nia família tomak, ami ne’e vítima no inosente la hatene buat ida, ikus mai ami rua tenke sofre ho lasu ne’ebé ha’u nia patraun (Jerry) rasik mak halo,” hateten arguido JPS ho tanis.

Notísia Relevante : Xanana-Jokowi Bele Buka Solusaun Ba Kazál Timoroan Lori Droga

Iha fatin hanesan AS mós deklara, nu’udar feen sente laran moras bainhira akompaña nia kaben JPS dehan ba Kupang ho intensaun atu kompras sasán hodi prepara ba sira nia serimónia kazamentu, ikus mai tenke enfrenta lei no manu  ba nakukun ne’ebé sira nunka imajina atu akontese iha sira na’in rua nia moris.

Kazál Timoroan ne’e hato’o agradese ba Estadu Timor-Leste ne’ebé kontinua akompaña sira nia kazu hahú husi inísiu too kazu julga iha tribunál.

“Ami agradese tebes governu kontinua tau matan ba ami hanesan nia povu. Ha’u sente laran moras ha’u ho nia kaben (JPS) hetan lasu husi nia patraun rasik too ohin loron halo ha’u hetan mós susar hotu husik hela ami nia oan na’in tolu ne’ebé sei ki’ik. Atan ha’u lahatene loos!?. Ha’u nia oan sira nia futuru atu sai oinsá?, See ami iha komarka la asiste sira nia vida moris no edukasaun la’o oinsá?,” tenik AS ho tanis.

Notísia Relevante : Embaixadór Alberto Carlos Vizita Kazál Timoroan iha POLRES Belu

“Ami husu ba na’i ulun sira, buka took dalan oinsá maka bele lori ami fila ba Timor-Leste. Ami rasik la hatene sasán ne’ebé ami lori tanba ha’u nia katuas-oan maka Servisu iha kompañia JVK mak tau fali susar ba ami rua bainhira identifika ai-moruk mak ami foin hakfodak. Ami dezde ki’ik too boot, moris han hemu la koñese buat ida droga. Ami mós moris han ho hemu la’ós tanba droga, maibé ami servisu maka hetan osan atu sustenta  moris no ami nia oan na’in tolu,” AS hateten.

Rona tiha deklarasaun ne’e, Konsuladu Zito ho Konsuladu João hakuak kazál Timoroan  ne’ebé tanis hodi motiva katak, Estadu Timor-Leste kontinua tau matan ba sira no husu atu kumpre kualkér desizaun mak Tribunál Indonézia sei deside.

Prokuradór Mantein Akuzasaun Pena Prizaun Tinan 17

Iha audiénsia julgamentu ne’ebé hala’o ba dala 14, segunda liubá (17/02/2020), Tribunál rona ona deklarasaun husi Advogadu, Jemmy Haekase, hodi aprezenta pledoi (nota pembelaan) tuir artigu 182 KUHAP hodi husu tribunál no prokuradór atu tetu desizaun fó pena tinan 17 ba nia kliente na’in rua.

Jemmy Haekase konsidera, nia kliente JSP nu’udar ema inosente ne’ebé servisu ba nia patraun Arguidu Jerry ne’ebé Polisia Timor-Leste kaptura no tama ona komarka maka fó orientasaun hodi haruka nia traballadór atu lori ai-moruk fó ema balun iha Lippo Plaza Kupang.

Advogadu ne’e mós husu atu tribunál fó pena prizaun diferente ba nia kliente AS nu’udar ema inosente ne’ebé akompaña de’it nia kaben  arguido JSP.

Hafoin analiza pledoi ne’ebé parte advogadu aprezenta, liuhosi prosesu julgamentu ba dala 15 ne’ebé hala’o kinta (20/02/2020), Prokuradór Andi P. Wicaksono deklara, sira mantein akuzasaun hodi fó pena prizaun tinan 17 ba arguidu JSP hodi selu multa osan no AS simu pena hanesan tinan 17 no selu multa diferente.

Prokuradór Andi hatutan, deklarasaun pledoi ne’e la fundamentu, tanba  kazál rua nu’udar sidadaun estranjeiru husi Timor-Leste viola artigu 102 letra (e) junto artigu 103 letra (e) lei númeru 17 tinan 2006 kona-ba mudansa lei númeru 10 tinan 1995 kona-ba (Kepabeanan) junto artigu 113 lei númeru 35 tinan 2009 kona-ba narkótika ho pena de morte (hukuman pidana mati) tanba tenta lori droga tama Fronteira Motain Atambua-Indonézia ho totál musan 4.874 ne’ebé Autoridade Seguransa (Beacucai) halo apreensaun iha loron 29 maiu 2019.

“Haree ba nota pleido ne’ebé parte avogadu aprezenta, ami halo analiza katak la iha razaun no fundamentu, nune’e ami mantein ho akuzasaun anteriór,” afirma Prokuradór Andi.

Rona tiha deklarasaun husi parte prokuradór nian, Juis koletivu, A.A Gede Susila P, SH, M Hum, Gustav Bless Kupa, SH no Fauzi, SH.MH husu ba Advogadu kazál Timoroan ne’ebé reprezentante husi Advogada Yeniwty S. Ataupah SH deside adia hikas ba kuarta (26/02/2020), hodi rona desizaun finál.

Juis A.A Gede Susila mós husu ba kazál Timoroan labele laran susar, no tenke halo reflesaun ba sira nia aan no reza makas, inklui han hahán ho di’ak para bele hetan kondisaun saúde ne’ebé di’ak liu.

Juis ne’e mós apresia ho kazál Timoroan tanba durante tama prizaun preventiva too kazu julga iha tribunál sira sempre koopera di’ak ho parte justisa no autoridade seguransa iha prizaun laran.

Governu Kontinua Akompaña

Governu Timor-Leste liuhosi Konsuladu Timor-Leste ba Kupang no Atambua, Indonézia, kontinua akompaña no partisipa prosesu julgamentu ba kazu kazál Timoroan nian nee iha Tribunál Distritál Atambua Indonézia.

Konsuladu Timor-Leste ba Kupang, Jesuíno dos Reis Matos “Zito” dehan, nia parte ho Konsuladu Timor-Leste ba Atambua, João Simão Sousa akompaña husi Diretór Asuntu Konsuladu, Hermínio Pinto, partisipa julgamentu ne’e fó suporta morál ba sidadaun rua, mezmu sira halo sala lori droga tama ema nia rain.

Parte konsuladu mós sei kontinua koordena ho parte advogadu atu fó protesaun másimu kazu ne’e atu bele hetan desizaun ida ho justu.

Iha fatin hanesan, reprezentante Família kazál Timoroan ne’e, Celeste da Silva Pereira, hato’o agradese ba Governu Timor-Leste ne’ebé kontinua tau matan ba sira nia oan nain rua.

“Ami família  agradese tebes, tanba governu la taka matan ba nia povu no ne’e hanesan orgullu boot ba ami família,”  Celesta da Silva Pereira hateten.

Nu’udar família, Celeste sente triste bainhira akompaña prosesu julgamentu iha Tribunál Distritál Atambua, haree prokuradór akuza kazál rua ho pena prizaun tinan 17 halo família sira iha Dili triste tebes.

Reprezentante família ne’e hatutan, tanba de’it hakarak defende sira nia família rua nia direitu, família deside buka osan tuir kbiit ne’ebé selu Advogadu Jemmy Haekase para fó asisténsia legál ba kazu ne’e tuir lei Indonézia nian.

Nia hatutan, husi parte família espera, desizaun ikus Tribunál Atambua iha kuarta (26/02/2020), agora bele fó pena ne’ebé justu sira nia família.

Iha parte seluk, família rasik sei husu responsabilidade morál ba Arguidu Jerry nu’udar patraun ba kompañia JVK ne’ebé lasu sira nia família bele responsabiliza hodi hadi’a naran di’ak família iha sosiedade Timor-Leste nia leet katak, kazál Timoroan ne’e nu’udar ema inosente.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here