Komísariu CAC, Sergio Hornai. Imajen/António Gonçalves

DILI, 24 fevereiru 2020 (TATOLI) – Komisáriu Komisaun Anti Korrupsaun (CAC), Sergio Hornai, husu ba Parlamentu Nasionál (PN) atu aselera lei anti-korrupsaun hodi fó kbiit liu tan ba servisu KAK nian atu kombate korrupsaun iha Timor-Leste.

Notísia Relevante :  Tinan 10 KAK ho Semináriu Nasional Loron Rua

“Kontinua husu ba Parlamentu Nasionál aselera  lejizlasaun ne’ebé agora sei pendente hela, hanesan ezbosu lei anti-korrupsaun,”  tenik Sergio Hornai ba jornalista sira iha ámbitu komemorasaun ezisténsia KAK ba dala-10, ohin, iha salaun Ministériu Finansa, Ai-tarak Laran, Dili.

Tuir nia haree, Parlamentu Nasionál iha kinta lejislatura ne’e, iha ona vontade hodi halo diskusaun ba ezbosu lei refere. Maske, ezbosu lei ne’e lori tempu naruk ona seidauk iha aprovasaun iha parlamentu, tanba presiza diskute liu-tan artigu sira hodi bele prodús lei ida ho kualidade.

Durante ne’e, Komisáriu Sergio Hornai hateten, KAK uza de’it kódigu penal no ordenamentu jurídiku internasionál sira seluk, tanba ne’e bainhira lei anti-korrupsaun  hetan ona aprovasaun sei fó forsa liu tan ba servisu KAK hodi kombate korrupsaun.

Notísia Relevante : KAK Kompleta Tinan 10

PN Tau Prioridade

Prezidenti Parlamentu Nasional, Arão Noe de Jesus.Imajen/António Gonçalves.

Biban ne’e, Prezidente Parlamentu Nasionál Arão Noe  de Jesus, hatete,  PN tau importánsia ba projetu lei anti-korrupsaun, tanba ne’e, kontinua halo debate iha komisaun A.

“PN hakarak sistematiza lei ida di’ak iha parte kriminál no medida preventiva,” tenik Arão Noe.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here