Logotipu KAK

DILI, 22 fevereiru 2020 (TATOLI) – Komisaun Anti Korrupsaun (CAC), ohin, kompleta tinan 10 (2010-2020) ezisténsia hodi serve povu ho Estadu Timor-Leste nia interese ba ‘prevensaun no kombate korrupsaun’ liuhosi Lei Nu.08/2009.

Notísia Relevante : KAK Énfaze Prioridade Tolu iha 2020

Bainhira KAK  atu harii, iha entuziazmu maka’as tebes hosi povu tomak. Entuziazmu no ánimu povu nian ne’e bele prova liuhosi prosesu asesmentu no konsultasaun públiku ba planu estabelesimentu KAK ne’ebé hala’o hosi ONG’s nasional ka entidade kompetente sira hodi husu povu nia hanoin kona-ba ejijénsia no importánsia hosi instituisaun ne’ebé lidera dahuluk husi Komisáriu Adérito de Jesus Soares.

Notísia Relevante : KAK Sei Kontinua Halo Prevensaun ba Korrupsaun

Aniversáriu KAK nian ba dala-10  ne’e prienxe ho atividade oioin, kompostu husi misa agradesimentu ne’ebé, ohin, hala’o iha Igreja Santo António Motaél, Dili no iha segunda (24/02/2020), iha semináriu internasionál loron tomak ne’ebé sei hala’o iha  Salaun Ministériu Finansa (MF), Dili.

Iha selebrasaun solene misa agradesimentu ne’ebé prezide husi Padre Vigáriu Igreja Parókia Santo António Motaél,  Pe. Mariano Maia, husu  KAK  atu kontinua serve ho responsabilidade tuir misaun no vizaun KAK nian  ba interese nasionál hodi lori prosperidade ba povu.

“Iha misa eukaristia ba selebrasaun loron Saun Pedro ninian, tanba ne’e refleta tebes ho misa agradesimentu komemorasaun loron aniversáriu KAK ninian, hanesan iha evanjellu hatete buat importante rua; dahuluk tau matan ba nain nia kreda no daruak kore iha rai no kesi iha Lalehan,” tenik Amu Mariano Maia iha nia omilia.

Mensajen evanjellu nian ne’e, tuir Amu Mariano Maia, atu CAC kontinua ho nia misaun no vizaun iha Timor-Leste atu tau matan ba knaar hotu ho domin, tau matan ho ‘rigor’ atu kontrola ho responsabilidade ba buat ne’ebé lao sala iha instituisaun Estadu liga ho aktu korrupsaun.

Padre Mariano Maia mós enkoraja ekipa KAK atu serve ho onestidade no ezije transparénsia iha hala’o knar prevene no kombate korrupsaun.

Komisáriu KAK, Sergio Hornai hato’o agradesimentu  ba primeiru no segundu komisáriu KAK ne’ebé ho responsabilidade lori jornada ho perkursu ezisténsia KAK mezmu ho dezafiu no obstákulu oioin.

Durante nia mandatu atu mai ho konsolida intermus kuadru, lakuna no ordenamentu jurídiku, oinsá reúne hetan forma ideal.
Nune’e oinsá hametin Estadu direitu demokrátiku ho rejeisaun ba korrupsaun ba boa governasaun idak di’ak.

Iha objetivu haat (4) ne’ebé KAK halo kompostu husi (1) atu fortalese instituisaun nian liuhosi rekrutamentu funsionáriu nian, oinsá atu haforsa instituisaun KAK hodi halo servisu kooperasaun nian sore anti korrupsaun. (2) Hala’o servisu investigasaun kriminalidade korrupsaun. Buka hatene no sobu rede (korrupsaun) sira. (3) Halo servisu prevensaun no sensibilizasaun hodi hametin ho jerente Estadu iha setór públiku atu livre husi korrupsaun no eduka jerasaun foun sira ne’ebé sei eskola atu iha futury sai matenek no lidera nasaun ho integridade di’ak. (4) Halo diskusaun aberta sobre anti-korrupsaun lider polítiku, ONG, lider komunitáriu regulármente.

Dokumentu ne’ebé Ajénsia Tatoli asesu husi ofisial KAK relata katak,  durante tinan 10 ne’e públiku hato’o keixa ba iha KAK hamutuk 486  no KAK halo auto-partisipasaun ba iha Ministériu Públiku (MP) ba kazu 219 – Delegasaun kompeténsia husi MP 279 – KAK kompleta (finaliza) investigasaun ba kazu 260 hodi haruka ba iha MP nu’udar na’in ba asaun krime.

Total arguidu ne’ebé iha prosesu sira ne’e hamutuk na’in 517 (Mane 439 no  Feto 68) ho total sasin 4.622 (Mane 3.684 mo  Feto 938).

Kazu korrupsaun sirak nee, KAK hato’o ba iha MP tuir lei, no MP mak halo akuzasaun liuhosi julgamentu iha tribunal.

Iha jerente senior iha funsaun públiku nian ezersísiu ne’ebé hetan akuzasaun no prova hetan pena prizaun no multa. Jerente seniór ka funsionáriu públiku sira ne’ebé prova iha julgamentu tribunal tama komarka Becora no Gleno mak; – Funsionáriu bain-bain – Xefe Unidade – Xefe Departamentu – Diretór Nasional – Diretór Jerál – Administradór Munisípiu – Ministra, Eis-Ministru, Vise-Ministru, Sekretáriu Estadu. – Membru no eis- membru governu balun nian kazu sei iha hela prosesu, balun iha hela komarka laran no balun kumpre ona sira ninia pena hodi fila ona ba iha sosiedade.

Tipu korrupsaun 10 mak KAK investiga no rekomenda ba MP kompostu husi;  (1) Abuzu konfiansa agravadu, (2) Burla agravadu, (3) Administrasaun Irregularidade ba verba públika, (4) Korrupsaun Pasiva ba kazu ilísitu, (5) Pekulatu uzu,  (6) Partisipasaun Ekonomia iha Negósiu, (7) Administrasaun Danoza, (8) Falsifikasaun Dokumentu, (9) Pekulatu no (10) Abuzu Podér.

Durante tinan 10 ne’e mós ekipa Prevensaun no Sensibilizasaun hala’o semináriu iha territóriu TL hamutuk 1070 no partisipasaun ema hamutuk 5.569; Estudante hamutuk na’in 31.094, Joven no sentru formasaun 2.763, Universitáriu na’in 6.639, konferénsia no semináriu sira ba ONG iha loron boot independénsia no loron eroi nasionál sira ho membru komunidade 12.383, Partidu polítiku no konviksaun relijioza sira 11.449.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here