Prezidente Repúbliku, Francisco Guterres Lú Olo kaer liman ho Komisáriu KAK, Sergio Hornai. Imajen/António Gonçalves

DILI, 24 fevereiru 2020 (TATOLI)-Komisaun Anti Korrupsaun (CAC) kompleta ona tinan 10 ezisténsia (2010-2020). Ba komemorasaun ne’e, KAK realiza semináriu nasionál ba loron rua; segunda-tersa (24-25/02/2020).

Notísia Relevante : KAK Kompleta Tinan 10

Semináriu ne’ebé hala’o iha salaun Ministériu Finansa, Ai-tarak Laran, Dili, aprezenta mós oradór nasionál no internasionál ho tópiku “Kombate Korrupsaun: Timor-Leste iha ne’ebé ona no atu ba ne’ebé iha tinan 10 mai”.

Komisáriu KAK, Sergio Hornai, hatete, semináriu  ne’e konvida oradór espesialista nasionál no internasionál partilla sira nia hanoin ba dezenvolvimentu KAK nian ba oin. Liu-liu  kona-ba lei anti korrupsaun ne’ebé seidauk halo no polítika nasionál ba estratéjia nasionál kombate korrupsaun.

“Ami haree tema ba semináriu nasionál ne’e jenériku nia lala’ok ba asaun estratéjia kombate korrupsaun konsolida instituisaun ho artikulasaun bazeia ba misaun no vizaun,” esplika Komisáriu KAK, Sergio Hornai.

KAK rasik kontinua kampaña no publisidade investigasaun kriminál halo nafatin hodi erradika krime korrupsaun ne’ebé mosu iha Timor-Leste.

Konferénsia ne’e partisipa hosi Prezidente Repúblika, Francisco Guterres Lú Olo, Prezidente Tribunál Rekursu, Deolindo dos Santos, Prezidente Parlamentu Nasionál Arão Noe de Jesus, Prokuradór Jerál Repúblika, Jose Ximenes, membru oitavu governu, membru parlamentu, korpu diplomátiku, ajénsia internasionál, prezidente autoridade munisípiu hotu, liña ministeriál, sosiedade sivíl, akadémiku no konvidadu sira seluk tan.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here