Diretór Nasionál Desportu, João Rodrigues, bainhira loke atividade desportiva ne’ebé organiza hosi Movimentu Estudante Universitáriu Suku Bauro (MESBAR), iha Suku Bauro, Postu Administrativu Lospalos, Munisípiu Lautein, Sesta (7/12/). Imajen Espesiál

DILI, 20 fevereiru 2020 (TATOLI)–Sekretáriu Estadu Juventude no Desportu (SEJD) iha kompromisu atu fó apoiu nafatin ba dezenvolvimentu Departamentu Desportu iha Universidade Nasionál Timor Lorosa’e (UNTL) para prodús profesór iha área desportu.

Iha tinan 2010 to’o 2012 SEJD estabelese ona Memorandu Entendimentu (MoU-sigla inglés) ho UNTL hodi oferese ona dosente timoroan no Internasionál hodi hanorin matéria desportu. Maibé, kooperasaun ne’e paradu hafoin memorandu ne’e termina iha 2012.

Diretór Nasionál ba Desportu Alta Kompetisaun, João Rodrigues, ba Agência TATOLI, hateten sei esplora oportunidade hodi ko’alia ho parte kompetente UNTL atu kontinua atualiza kooperasaun ne’e ba futuru.

Notísia Relevante :Departementu Desportu UNTL Kontinua Esforsu hodi Hetan Akreditasaun

“To’o agora ha’u tenta nafatin halo aprosimasaun ho UNTL se karik iha posibilidade bele atualiza filafali memorandum entendimentu ne’e, depois ita bele kontinua fó apoiu ba malu hodi tau-matan ba kursu desportu ne’e,” dehan Diretór Nasionál SEJD, João Rodrigues iha ninia servisu fatin, Lecidere, Dili, ohin.

SEJD hakarak reativa MoU ne’e ho intensaun ida atu forma profesór ho koñesimentu espesífiku iha área desportu.

Notísia Relevante :Departamentu Desportu La Akreditadu, UNTL Haruka Dosente Ba Hasai Kursu Espesializadu

“Ita halo kooperasaun ne’e ho intensaun hakarak forma profesór edukasaun fízika ne’ebé espesialista duni iha área desportu. Tanba edukasaun fízika ne’e multilaterál la’ós orienta iha modalidade ida de’it,” nia tenik tan.

Bainhira kooperasaun ne’e reativa ka estabelese MoU foun, SEJD sei fasilita mobilidade Estadu nian hanesan Jináziu Dili (Gedung Matahari Terbit), Kampu Demokrasia no Kampu Futsál no seluk tan ba UNTL hodi halo prátika.

Entretantu, antes ne’e, hosi parte UNTL mós deklara ona sei buka atu halo diskusaun ho parte SEJD hodi estabelese kooperasaun foun.

Jornalista : Tomé Amado

Editór       : Agapito dos Santos 

HAKEREK NO HATÁN

Please enter your comment!
Please enter your name here