DILI, 17 fevereiru 2020 (TATOLI)-Universidade Nasionál Timor Lorosa’e (UNTL), dadaun ne’e kontinua halo esforsu hodi dezenvolve Departementu Desportu liliu formasaun rekursu umanu no ekipamentu nune’e bele hetan ona akreditasaun hosi Ajénsia Nasionál Avaliasaun Akreditasaun Akadémika (ANAAA) iha futuru.
Pro Reitór Asuntu Akadémiku UNTL, Miguel Maia dos Santos, ba Agêcia TATOLI ohin, informa UNTL hamosu Departementu Desportu antes ne’e tanba hetan kooperasaun ho Sekretáriu Estadu Juventude no Desportu iha tinan rua liubá ne’e.
“Ita konsidera iha nasaun Timor-Leste kuaze eskola sira seidauk iha profesores ba Edukasaun Fízika no Desportu entaun ita hamosu departementu ne’e atu tulun eskola sira bele hetan profesores espesífiku ba área ida ne’e,”dehan Miguel Maia dos Santos, iha ninia servisu fatin UNTL Dili.
Notísia Relevante :Departamentu Desportu La Akreditadu, UNTL Haruka Dosente Ba Hasai Kursu Espesializadu
Maibé kooperasaun entre UNTL ho SEJD remata ona tanba ne’e parte universidade sei esplora posibilidade hodi estabelese akordu foun ho SEJD iha tempu besik.
“Ita haruka ona Dosenti na’in rua ba kontinua sira nia estudu iha Portugal hodi hasai tan kursu mestradu espesífiku iha área desportu no universidade mós esforsu hodi kompleta fasilidade sira inklui kampo ba estudante sira atu hala’o prátika desporto,”tenik tan.
Notísia Relevante :ANAAA Sei Avalia Departamentu Pré-Eskolár UNTL Kuandu Iha Ona Graduadu
Miguel Maia dos Santos, fiar katak ho kooperasaun foun ho SEJD sei tulun di’ak liután UNTL hodi halo preparasaun para hetan akreditasaun hosi Ajénsia Nasionál Avaliasaun Akreditasaun Akadémika (ANAAA).
Jornalista : Tomé Amado
Editór : Agapito dos Santos