Reitór UNTL, Francisco Miguel Martins

DILI, 29 jullu 2019 (TATOLI)—Reitór Universidade Nasionál Timor-Leste (UNTL), ohin, hateten katak sente triste bainhira Departamentu Desportu ne’ebé tutela iha Fakuldade Edukasaun, Arte no Umanidade (FEAU) la prienxe kritéria avaliasaun husi ANAAA (Ajénsia Nasionál Avaliasaun no Akreditasaun Akadémika) nian no la hetan akreditasaun.

“Ha’u triste uitoan ho Fakuldade Edukasaun tanba saida mak seidauk iha preparasaun ida di’ak ba Fakuldade kria ona programatiku ba Departamentu Desportu ne’e. Tanba saida mak la hanoin kedas kuandu laiha posibilidade bele transferénsia ba programa seluk,” dehan Reitór UNTL, Francisco Miguel Martins, ba jornalista sira iha Salaun Enkontru FDCH, Fatuhada, segunda (29/7/2019).

Nia hatutan, hafoin simu informasaun ka rezultadu avaliasaun husi ANAAA halo ba Departamentu Desportu iha Instituisaun ne’ebé nia lidera, reitór universidade públiku ne’e hakfodak tanba loloos UNTL mak sai matadalan ba Instituisaun Superiór sira seluk ne’ebé eziste iha Timor-Leste.

Departamentu ne’e, nia informa, la pasa tanba la prienxe kritériu. Tanba ANAAA uza kritériu sira ne’ebé rigorozu ho padraun internasionál no fasilidade ne’ebé departamentu ne’e iha inklui rekursu umanu sira ne’ebé reforsa prosesu ensinu aprendizajen mak sai dezafiu boot.

Maibé ho fallansu sira ne’e hotu, nia haktuir, oras ne’e daudaun universidade haruka ona dosente ida ba hasai tan kursu mestradu espesífiku desportu nian iha Portugal para bele mai reforsa fila fali departamentu ne’e hodi hatán ba ANAAA ninian avaliasaun sira tuir mai.

“Ami hahú ona investe atu hetan kualidade iha profesór. Tan ne’e mak Departamentu Desportu ne’ebé mak la tama akreditasaun ami aselera ona prosesu hotu inklui rekursu umanu ba na’in ida estuda kona-ba area desportu. Tan ne’e, nu’udar reitór kontinua apoiu nafatin para bele ezerse papél Governu nian iha nivel edukasaun,” nia hateten.

Notísia relevante: http://www.tatoli.tl/2019/07/16/anaaa-akredita-ensinu-superior-11-departamentu-55-hetan-c/

Jornalista: Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here