Vise Prezidente Komisaun A ne'ebé trata asuntu Konstituisaun no Justisa, Francisco de Vasconcelos. Imajen/ Egas Cristovao

DILI, 19 fevereiru 2020 (TATOLI)—Partidu Demokrátiku (PD) no Partidu Libertasaun Populár (PLP) hahú ona kria konfiansa molok forma konfigurasaun foun ba situasaun polítika atuál.

Vise Prezidente Konsellu Polítika Nasionál PLP, Francisco de Vasconselos hateten, partidu polítiku sira hasoru-malu hodi buka solusaun ba problema ne’ebé akontese iha rai-laran entaun tenke iha entendimentu ida.

“Ita labele lakon tempu barak liubá asuntu sira ne’ebé la pertenente maibé ita lakon tempu barak liubá dezenvolvimentu. Solusaun ho PD katak ohin ami mai enkontru hodi kria komunikasaun inísiu depois sei ko’alia oinsá bele kria konfiansa ida forma konfigurasaun foun hodi bele garante ba ita-nia sidadaun sira. Konfiansa ne’e mak tenke iha koligasaun foun ida,” dehan Francisco de Vasconselos ba jornalista sira hafoin hasoru-malu ho dirijente PD iha sede PD, Kolmera, kuarta (19/2/2020).

Entretantu, Sekretáriu Jerál Partidu Demokrátiku (PD), António da Conçeição hateten, PD sempre halo komunikasaun ho partidu polítiku hotu.

Notísia Relevante: PLP Prontu Hasoru Kualkér Konfigurasaun

“PD kontinua promove diálogu. Ba ami (PD), nafatin ko’alia kona-ba saida mak ami aprezenta ba Prezidente Repúblika hanesan pozisaun PD nian katak agora situasaun rekere responsabilidade partidu polítiku sira nian, atu fó filafali mudansa pensamentu ba ita-nia povu hodi haree no hatene katak nasaun sei moris hakmatek,” nia afirma.

Ohin, nia haktuir, belun sira hosi PLP mai hasoru PD tanba partilla hanoin sira ne’ebé maka ko’alia kona-ba posível formasaun Governu ida bá-oin ninian, hanesan ko’alia ona ho partidu sira seluk katak PD nia odamatan nakloke luan.

Notísia Relevante: PLP Laiha Intensaun Forma Koligasaun Foun ho CNRT

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here