Vise Prezidente Komisaun A ne'ebé trata asuntu Konstituisaun no Justisa, Francisco de Vasconcelos. Imajen/ Egas Cristovao

DILI, 18 fevereiru 2020 (TATOLI)—Vise Konsellu Polítika Nasionál (CPN) Partidu Libertasaun Populár (PLP), Francisco Vasconselos informa, ohin, Partidu Libertasaun Populár hasoru-malu ho FRETILIN hodi deskute kona-ba situasaun polítika atuál.

Nia hatutan, solusaun ida-ne’ebé di’akliu mak dezenvolvimentu tenke la’o no labele para. Entaun, kontribuisaun hosi partidu polítiku sira-nian tenke halo komunikasaun polítika ba prosesu ida-ne’e. PLP nu’udar partidu polítika tenke prontu hasoru kualkér konfigurasaun iha situasaun polítika atuál.

“Partidu polítiku tenke prontu ba kualkér konfigurasaun ne’ebé mosu tanba ne’e mak devér partidu polítiku nian. Katak, buka kria komunikasaun hanesan mós partidu sira seluk halo. PLP mai iha FRETILIN hodi halo komunikasaun para buka solusaun rezolve problema ho solusaun ba ita-nia problema nasionál ne’ebé mak Prezidente Repúblika husu ba entidade tomak,” dehan Francisco Vasconselos ba jornalista sira hafoin hafoin hasoru-malu ho Adjuntu Sekretáriu Jerál FRETILIN, José Reis, iha Comite Central Fretilin (CCF), Comoro, ohin.

Nia esplika, PLP hala’o movimentu polítiku ho FRETILIN bazeia desizaun Prezidente Repúblika, Francisco “Lú Olo” Guterres, ne’ebé deside liuhosi reuniaun líder istóriku sira katak partidu sira ne’ebé hetan asentu parlamentár tenke buka malu hodi fó solusaun ba situasaun polítika atuál.

“Partidu Polítiku tenke iha nia desizaun maibé foin mak ita diskute. Ne’ebé, sei iha tempu maibé labele kle’ur liu. PLP nia pozisaun labele kle’ur liu tanba ita labele sakrifika ita-nia povu. Kona-ba PLP sei hasoru CNRT, kualkér partidu polítiku sira-ne’ebé iha asentu Parlamentár tenke prontu hasoru hodi diskute,” nia dehan.

Nia afirma, Eleisaun Antesipada (EA) ne’e últimu rekursu entaun partidu polítiku sira tenke iha vontade buka solusaun ba problema, la’ós ignora tiha kapasidade.

Entretantu, Adjuntu Sekretáriu Jerál FRETILIN, José Reis hateten, enkontru ida-ne’e atu bele kria konfiansa entre partidu polítiku hafoin desizaun Prezidente Repúblika nian atu halo komunikasaun no buka solusaun ba iha impase ida-ne’e.

“FRETILIN nia pozisaun lakohi sai blokeiu solusaun ba impase tanba ne’e FRETILIN nia estratéjia ida depois retiru Viqueque preparadu ba iha 2023. Maibé, problema ne’e mosu hosi uma-laran no Governu ne’e monu entaun FRETILIN haree katak problema boot, asume mós responsabilidade ne’ebé ke FRETILIN iha,” nia hateten.

Nia afirma, FRETILIN lakohi sakrifika povu millaun 1.2 nia vida tanba de’it interese partidu nian maibé importante liu mak povu no Estadu nia vida.

“Ohin ho PLP, ami tuur hamutuk oinsá mak bele fó solusaun bá-oin no konserteza tau hamutuk hanoin oinsá atu fó solusaun di’akliu ba iha situasaun ida-ne’e. FRETILIN fiar katak tenke rezolve no hetan solusaun problema ida-ne’e,” nia dehan.

Nia hatutan, pozisaun FRETILIN nian mak Eleisaun Antesipada ne’e “lae” no FRETILIN nia estratéjia ba iha 2023. Maibé, situasaun ne’e mosu hosi uma-laran entaun FRETILIN iha responsabilidade labele husik situasaun ida-ne’e.

“Eleisaun Antesipada beibeik problema boot ba iha ita-nia rain. Tanba ne’e mak justu no demokrátiku liu labele iha Eleisaun Antesipada. Iha tempu badak, ami sei buka solusaun ida-ne’ebé ke di’ak no halo fali relatóriu ba Prezidente Repúblika, iha solusaun ka laiha solusaun,” nia hateten.

Notísia Relevante: PLP Apoiu Kualkér Desizaun Husi Xefe Estadu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here