Militantes no simpatisantes Partidu Libertasaun Popular (PLP) wainhira partisipa iha kampanha Parlamentar neebe halao iha Tasi Tolu, Domingu 16 Juilu 2017. Timor Leste sei halao eleisaun Parlamentar iha dia 22 Juilu 2017.Foto TATOLI/Antonio Goncalves

DILI, 19 fevereiru 2020 (TATOLI)—Vise Prezidente Konsellu Polítika Nasionál Partidu Libertasaun Populár (PLP), Francisco de Vasconcelos hateten, partidu refere laiha ajenda atu halo movimentu polítiku hodi forma koligasaun foun ho Partidu Congresso Nacional de Reconstrução de Timor (CNRT) tanba kestaun orsamentu la pasa iha Parlamentu Nasionál.

“Ajenda ho CNRT, lae! Tanba hori bainhira ami hamutuk koligasaun depois sira soe hela tiha ami, sira vota kontra tiha Orsamentu Jerál Estadu. Ne’ebé, ho CNRT, lae. Ami laiha intensaun ho CNRT,” dehan Francisco de Vasconcelos, hafoin hasoru-malu ho dirijente Partidu Demokrátiku (PD) iha Sede PD, Kolmera, ohin.

Nia argumenta, loloos partidu sira ne’ebé envolvidu iha koligasaun ida tenke salva orsamentu la’ós kontra fali orsamentu hosi Governu.

Vise CPN-PLP ne’e haktuir, razaun PLP lakohi hamutuk CNRT tanba forma tiha Aliansa Mudansa Ba Progresu maibé CNRT baku-fila tiha.

“Entaun saida mak ideál ba ita. Ideál mak vontade polítika. Ida-ne’e mak ezijénsia,” nia hateten.

Nia afirma, Timor-Leste iha Planu Estratéjiku Dezenvolvimentu Nasionál (PEDN) ne’ebé di’ak tebes maibé polítiku sira halo jogu kontra jogu, hatún ida no hasa’e ida, ne’e la’ós preferénsia ba PLP.

“CNRT vota kontra orsamentu signifika CNRT sai ona hosi AMP. Tanba, koligasaun ne’e buat tolu importante hanesan programa tenke pasa, orsamentu tenke pasa no lei importante sira tenke pasa, maibé CNRT kontra,” nia afirma.

Kestaun ne’e, nia dehan, PLP levanta tanba Governu deside retira proposta OJE 2020 ho montante biliaun $1.995 iha loron 3 dezembru 2019 [faze jeneralidade loron daruak] tanba la estruturadu no inskonstitusionál.

Tanba ne’e, nia informa, Governu kumpre rekomendasaun PN nian hodi redús ba biliaun $1,668 no proposta ne’e Governu aprezenta hikas ba Parlamentu Nasionál iha 19 dezembru 2019.

Parlamentu Nasionál hahú debate Orsamentu Jerál Estadu (OJE) iha loron 15, 16 no 17 dezembru 2019 maibé iha loron ikus faze espesialidade orsamentu ne’e la pasa.

Proposta OJE ho montante biliaun $1,668 la pasa iha jeneralidade loron datoluk, iha loron-sesta (17/1/2020) ho votu a-favór 13, kontra 15 no abstesaun 25.

Notísia Relevante: PLP Prontu Hasoru Kualkér Konfigurasaun

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here